Aqyn T. Tuıaqbaıdyń jańa jyr jınaǵy jaryqqa shyqty
Aqyn Tóregeldi Tuıaqbaı oqyrmandarǵa óziniń «Bastaý», «Óz kózimmen», «Qarly quıyn», «Orman ańyzy», «Jan daýysy», «Súımegender saǵynbaıdy» atty poezııa kitaptarymen jáne kórkem aýdarma týyndylarymen jaqsy tanys. Óleńderi birneshe tilge aýdarylǵan aqynnyń belorýs tilinde «Snejny chalavek» (1992) atty kitaby jaryq kórgen.
L.N. Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negımov «Júıeli oıǵa, kıeli sózge yntazar aqyn» degen taqyryppen osy kitapqa alǵysóz jazǵan. «Tórt toǵys» atty sóz bıi kitabynda avtordyń aqyndyq joldaǵy maqsaty, oı-parasaty, zamanǵa, qoǵamǵa, ýaqytqa, ultqa kózqarasy aıqyn kórinis tapqan.
«Óleń sózdi ózgeshe órip, syńǵyrlatqan, oıshyldyq pen rýhanı sulýlyq, náziktik pen syrshyldyq birtutas qubylysqa aınalǵan. «Sóz aldy» deıtin lebizinde aqyndyq kredosy taıǵa tańba basqandaı aıqyn sıpattalǵan. Sózdiń mánin, symbat-sánin, oramyn, retin qııýlastyryp keltirý, tigisin jatqyzý, óreli oı-pikirlermen tuzdyqtaý, oqyrmannyń zerde, sana aınasynda tereń iz qaldyrý - aqyn Tóregeldiniń súıikti máneri»,- deıdi ǵalym Serik Negımov.
Aqynnyń jańa týyndysy 9 baspa tabaqtan, 216 betten turady.