Aqyn T. Tuıaqbaıdyń «Súımegender saǵynbaıdy» atty shyǵarmashylyq keshi ótti

Elorda ákimdigi men Qazaqstan Jazýshylar odaǵynyń Astana qalalyq fılıalynyń uıymdastyrýymen ótken bul óner keshi aqynnyń 60 jasqa tolý qurmetine arnaldy.

T. Tuıaqbaı «Jalyn» jýrnaly men baspasynda, odan keıin Syrtqy ister, Mádenıet jáne aqparat mınıstrlikterinde, Premer-mınıstr Keńsesinde jáne Prezıdent Ákimshiliginde qyzmet atqaryp, ómir mektebinen ótken. Aqyn búgingi tańda Qazaqstan Respýblıkasy Parlamenti Májilisi Apparatynyń Redaktsııalaý jáne aýdarma bólimi meńgerýshisiniń orynbasary qyzmetin atqarady.

Jyr keshin júrgizgen tanymal aqyn, Qazaqstan Jazýshylar odaǵynyń Astana qalalyq fılıalynyń dırektory Nesipbek Aıtuly qoı jyly toı jyly bolyp, Tóregeldi aqynnyń toıymen bastalyp otyrǵanyn aıtyp ótti. «Turpaty erekshe, taǵdyry men tynysy bólek aqyn Tóregeldi Tuıaqbaı 1970 jyldary qazaq poezııasyna kelgen jas ókilderdiń biri boldy. Sol jyldary «Kisi kıik» poemasyn jazdy, ol týyndysy respýblıkalyq baıqaýda bas júlde aldy. Sol kezde ádebıet álemine óreli óleńimen ózine jalt qaratqan aqyn kelgenin bildik»,- dedi Nesipbek Aıtuly.

Kelesi kezekte Parlament Májilisi Apparatynyń Redaktsııalaý jáne aýdarma bóliminiń meńgerýshisi Dáýitáli Omashuly sóz alyp, aqynǵa izgi tilegin jetkizdi.

Mereıtoı ıesine Qazaqstan Jazýshylar odaǵynyń quttyqtaýy jáne Qazaqstan Respýblıkasy Parlamenti Májilisi Tóraǵasynyń alǵysy tabys etildi. Sondaı-aq «Mádenıet salasynyń úzdigi» belgisimen marapattaldy.

Óner ýnıversıtetiniń jáne memlekettik akademııalyq qazaq mýzykalyq drama teatrynyń ártisteri aqynnyń óleńderin mánerlep oqyp berdi, sondaı-aq aqynnyń sózine jazylǵan ánderdi shyrqady.

L.N. Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negımov sózdiń mánin, symbat-sánin, oramyn, retin qııýlastyryp keltirý, tigisin jatqyzý, óreli oı-pikirlermen tuzdyqtaý, oqyrmannyń zerde, sana aınasynda tereń iz qaldyrý aqyn Tóregeldiniń súıikti máneri ekenin aıtyp ótti. Til zergeri, belgili ǵalym: «Aqyn «masat» uǵymyn ózindik jumbaq oılarymen túrlendiredi. Ár dybysqa maǵyna arqalatady: Mátin - Adym - Saz-kúıi - Aıta bilý - Tyńdaı bilý. Óleń sózdiń basty sıpattary, negizgi sharttary - osylar. «Sóz bıi» tirkesimi sony. Sóz - bılik - kesim, úkim aıtýdyń kepili. Ult tarıhyndaǵy kósem de danagóı bı-sheshenderdiń pármendi, jalyndy sózderi ultty uıystyrdy. Sózde kıe boldy. Ádiletke, ujdanǵa, danalyqqa, kórkemdikke malynǵan súıek balqytarlyq kıeli sózdiń ıesi bı boldy, bıde bılik boldy, elde bereke boldy. «Sóz bıinde des bermeı kúshti aǵysqa, kertolǵaýly qaıyrý - qysqa-nusqa» deýinde telegeı syr bar.»- dep oı tolǵady.

Mereıtoı ıesiniń óner jolyndaǵy dosy, tanymal aqyn Ádilǵazy Qaıyrbek osy keshte Tóregeldi Tuıaqbaıǵa arnaǵan óleńin oqyp berdi.

Sondaı-aq osy kúni Qazaqstan Respýblıkasy Mádenıet jáne sport mınıstrliginiń baǵdarlamasy boıynsha Astana qalasyndaǵy «Folıant» baspasynan shyqqan aqyn Tóregeldi Tuıaqbaıdyń «Tórt toǵys: Sóz bıi kitaby» atty jańa kitabynyń tanystyrylymy ótti.