Aqyn Shómishbaı Sarıev dúnıeden ozdy
ALMATY. QazAqparat - Qazaqstannyń eńbek sińirgen qaıratkeri Shómishbaı Sarıev 75 jasqa qaraǵan shaǵynda qaıtys boldy,dep habarlaıdy QazAqparat tilshisi.
Bul qaraly habardy Mádenıet jáne sport mınıstrliginiń baspasóz qyzmeti rastady.
Shómishbaı Sarıev 1946 jyly 15 sáýirde Qyzylorda oblysy, Aral aýdany, Shómish stansasynda dúnıege kelgen.
Eńbek jolyn Qazaly aýdandyq «Lenın týy», Aral aýdandyq «Tolqyn» gazetterinen bastaǵan. Keıinnen «Qazaqstan» baspasynyń redaktory, «Juldyz» jýrnaly bóliminiń meńgerýshisi, Qazaqstan Respýblıkasy Ulttyq ǵylym akademııasy Muhtar Áýezov atyndaǵy Ádebıet jáne óner ınstıtýtynyń ǵylymı, aǵa ǵylymı qyzmetkeri bolǵan.
1971 jyly QazMÝ-diń jýrnalıstıka fakýltetin bitirgen.
1996 jyly «Qazirgi qazaq lırıkasynyń izdenisteri» atty taqyrypta ǵylym kandıdaty dárejesin ıelendi. «XX ǵasyrdyń jıyrmasynshy jyldardaǵy poezııasy» atty monografııa jazǵan. Qazirgi ýaqytqa deıin M.O.Áýezov atyndaǵy Ádebıet jáne óner ınstıtýtynda ǵylymı qyzmetker boldy.
«Ǵashyqtar jyry», «Bozjorǵa» atty avtorlyq beınetaspasy jaryq kórdi. G.Gýlıa, O.Berggolts, I.Abashıdze, S.Vıkýlov, A.Dementev, F.Alıeva, R.Rojdestvenskıı, M.Emıneský, t.b. aqyndardyń óleńderin qazaq tiline aýdarǵan.
Alǵashqy jyr jınaǵy 1974 jyly «Baldáýren» degen atpen jaryq kórgen. Sodan bergi aralyqta qazaq, orys tilderinde on bes shaqty kitaby shyqty.
1994 jyly «Jazýshy» baspasynan tańdamaly óleńder tomdyǵy, 1992 jyly «Súıinshi» degen atpen án óleńderi jeke jınaq bop basylǵan.
«Tarlan» syılyǵynyń ıegeri. Qazaqstannyń eńbek sińirgen qaıratkeri.
