Aqyn Serik Turǵynbekuly jyrsúıer qaýymdy shyǵarmashylyq keshine shaqyrady
ASTANA. Maýsymnyń 5-i. QazAqparat - Búgin Elordanyń Kongress-Hol saraıynda tanymal aqyn, halyqaralyq Alash syılyǵynyń ıegeri Serik Turǵynbekulynyń shyǵarmashylyq keshi ótedi,
dep habarlaıdy QazAqparat.
1946 jyly qasıetti Torǵaı óńirinde týǵan Serik Turǵynbekulynyń esimi jyrsúıer qaýymǵa jaqsy tanys. Kóptegen jyr kitaptarynyń avtory. Birneshe múshaıralardyń jeńimpazy. Aıtalyq, 1995 jyly Abaı Qunanbaıulynyń týǵanyna 150 jyldyq mereıtoıyndaǵy aqyndar múshaırasynda bas júldeni ıelendi.
Jastyq jáne jigit aǵasy shaqtaryn Almaty qalasynda ótkizgen, elmen birge Elordaǵa qonys aýdarǵan Serik Turǵynbekuly sońǵy on jylda Astana jaıly nebir týyndylardy dúnıege ákeldi.
Búgingi keshti aqyn «Aspan asty - Astana» dep ataǵan. Óziniń aıtýynsha, memleketimizdiń Elordasy - barsha qazaqtyń maqtanyshy, keleshek urpaqtyń qalasy. Shyǵarmashylyq keshte Astana týraly jyr da oqylady, án de shyrqalady.
Qudiretti jyrdan qýat alamyn degen Elorda turǵyndary men qala qonaqtaryna Kongress-Hol saraıynyń esigi ashyq. Keshtiń bastalýy - saǵat 17-00-de.
