Aqyn Saranyń murajaıynda 700-den astam eksponat bar

TALDYQORǴAN. QazAqparat - Almaty oblysyndaǵy Aqsý aýdanyna qarasty Qapal aýylynda aqyn Saranyń murajaıy bar. Nebári 38 jyl ǵana ómir súrgen aqynnyń turmysta qoldanǵan zattary osy murajaıda saqtaýly, dep habarlaıdy QazAqparat tilshisi.

Sara Tastanbekqyzynyń qolyna alǵash ustaǵan dombyrasy, tigin mashınasy, qaıshysy jáne turmysta qoldanǵan qara qazany mýzeıde tur. Qazir osy tórt zat murajaıdaǵy eń qundy jádiger bolyp sanalady.

«Memorıaldy mýzeı 1993 jyly Sara Tastanbekqyzynyń 115 jyldyǵyna oraı ashyldy. Aqyn Saranyń mýzeıi ornalasqan ǵımarattyń ózindik tarıhy bar. Bul ǵımarat Qapal ýezi bolǵan kezde bas dáriger Sobolevskıı degen kisiniń emhanasy boldy. Tipti óziniń saparlarynda Shoqan Ýálıhanov  osy jerge aıaldap, em alǵan degen derekter de bar», - dedi S.Tastanbekqyzy atyndaǵy memorıaldy mýzeıdiń meńgerýshisi Aıgúl Álimbaeva.

Jalpy murajaı tórt bólimnen turady. Tórt bólim de bes balany dúnıege ákelgen Saranyń ómiri men shyǵarmashylyǵynan syr shertedi. Birinshi bólim - Sara Tastanbekqyzynyń balalyq shaǵyna, ekinshi bólim - onyń ósken ortasyna, úshinshi bólim - shyǵarmashylyǵyna jáne tórtinshisi aqynnyń izbasarlary men urpaqtaryna arnalǵan. 

Murajaıda 700-den astam eksponat bar. Qapal jerinde 1878 jyly dúnıege kelgen aqyn Saranyń kesenesi de osy aýyl mańynda ornalasqan. Kóptegen týrıster kesenege arnaıy baryp, basyna quran baǵyshtap turady.