Aqyn Saranyń 165 jyldyǵyna oraı respýblıkalyq aıtys ótti
TALDYQORǴAN. QazAqparat - Almaty oblysynda aıtystyń aqtańger aqyny Sara Tastanbekqyzynyń 165 jyldyǵyna oraı respýblıkalyq aıtys ótti. «Jetisýdyń Sarasy - bar qazaqtyń darasy» atty jyr dodasynda Jandarbek Bulǵaqov bas júldeni qanjyǵalap, 1,5 mln teńge aqshalaı syılyqqa ıe boldy, dep habarlaıdy QazAqparat tilshisi.
Aqynnyń týǵan ólkesi Aqsý aýdany Jansúgirov aýylynda ótken aıtysta birinshi oryndy shyǵysqazaqstandyq Sara Toqtamysova enshiledi. Ekinshi oryn jetisýlyq Balǵynbek Imashevqa, al úshinshi oryn almatylyq Syrym Áýezhan men Soltústik Qazaqstannan kelgen Muradym Mırlanovqa buıyrdy.
Al Aqsý aýdany ákiminiń arnaıy júldesi aıtysqa jańadan qadam basqan Almaty oblysynyń jas aqyny Jalǵas Sadyrulyna berildi. Astanadan kelgen Aınur Tursynbaeva, Pavlodardyń namysyn qorǵaǵan Qýanysh Sharmonov, aqmolalyq Nurıslam Ábdil, Túrkistan oblysynyń ókili Jarqynbek Naýshabekovqa yntalandyrý syılyqtary usynyldy. Marapattardy Almaty oblysy ákiminiń orynbasary Aqan Ábdýálıev tapsyrdy.
Saıystyń kórigin qyzdyrǵan sóz sheberleri jeńil ázil, astarly oı aıtyp kórermenderdiń kóńilinen shyqty. Sara aqyn jaıly kóptegen derekter aqyndar tilimen jyrlandy. Qoǵamdaǵy oryn alyp otyrǵan keleńsiz jaıttar da nazardan tys qalmaı, oı salarlyq dúnıeler kórkem túrde jetkizildi.
Aqynnyń eskertkishine gúl shoqtaryn qoıýdan bastalǵan shara Sara Tastanbekqyzy atyndaǵy jastar mádenı ortalyǵynda jalǵasty. Munda ataqty «Birjan - Sara» operasynan teatrlandyrylǵan úzindi qoıyldy. Basty rólderdi mereıtoılyq sharaǵa arnaıy shaqyrylǵan Qazaqstan Respýblıkasynyń eńbek sińirgen qaıratkeri, akter Saǵat Jylkeldıev pen QR mádenıet qaıratkeri, ánshi Gúlmaıdan Súndetova somdady. Sondaı-aq kórme uıymdastyrylyp, oǵan aqyn qoldanǵan turmystyq zattar men olardyń birqatar kóshirmeleri, kitaptar, fotosýretter qoıyldy. Olardyń arasynda «NAQ-Birlik» qoǵamdyq uıymy men oblystyq Qazaqstan halqy Assambleıasy ókilderi birlesip Reseıden alyp kelgen aqyn Saranyń músinshi Margarıta Vaşenko salǵan sýreti de bar.
