Aqyn Nurlan Qalqa «jasulandyqtarmen» kezdesti
Іs-shara Memlekettik tildi damytý qorynyń áleýmettik seriktesi - «Samruk-Kazyna Trust» qorymen birge uıymdastyryldy.
Kezdesýdiń maqsaty - Elbasynyń «Bolashaqqa baǵdar: ulttyq jańǵyrý» atty eńbeginde aıtylǵandaı, óskeleń urpaqty otansúıgishtik rýhynda tárbıeleý, olardyń ón-boıynda týǵan jerge degen súıispenshilik pen maqtanysh sezimin qalyptastyrý, halqymyzdyń ulttyq mádenıeti men dástúrine degen qyzyǵýshylyqtaryn oıatý.
Taǵylymdyq máni zor is-shara barysynda Memleket basshysynyń ulttyq jańǵyrý týraly jańa eńbeginde aıtylǵan keleli máseleler men kemel pikirler jan-jaqty áńgimelendi. Ásirese, «jasulandyqtar» Tuńǵysh Prezıdentimiz - Qazaqstan Respýblıkasy Qarýly Kúshteriniń Joǵarǵy Bas Qolbasshysy Nursultan Nazarbaevtyń osy eńbeginde zor tebirenispen jazylǵan «Bizdiń babalarymyz ǵasyrlar boıy ushqan qustyń qanaty talyp, júgirgen ańnyń tuıaǵy tozatyn ulan-ǵaıyr aýmaqty ǵana qorǵaǵan joq. Olar ulttyń bolashaǵyn, keler urpaǵyn, bizdi qorǵady. San taraptan suqtanǵan jat jurtqa Atamekenniń qarys qadamyn da bermeı, urpaǵyna mıras etti» degen oı-tolǵamdaryn áserlene tyńdady.
«Jas ulan» mektebiniń tárbıelenýshileri aldynda aqyn Nurlan Qalqa sóz sóılep, óz shyǵarmashylyǵymen tanystyrdy. Óziniń «Álııa-Mánshúk», «Batyr ata - Baýyrjan», «Baýyrjandaı bolamyz», «Saǵadat ata - nar tulǵa», «Jas ulan» mektebi» atty óz óleńderin oqyp, shyǵarmashylyq joly týraly áńgimeledi, oqýshylardyń suraqtaryna jaýap berdi.
Kezdesý sońynda aqyn jańa kitaptarymen tanystyryp, oqýshylarǵa jáne mektep kitaphanasyna qoltańbasy qoıylǵan kitaptaryn syılady. Sonymen qatar, uıymastyrýshylar atynan kezdesýge qatysýshylarǵa «Tátti alma» atty 2 tomdyq jınaq tartý etildi.
