Aqyn Málik Berdi Áliniń «Júrek sózi» atty jańa jyr jınaǵy jaryq kórdi
Buǵan deıin qalamgerdiń «Qos ǵasyrdaǵy bir ǵumyr» (2001 jyl) jáne «Aınalaıyn» (2007 jyly) atty óleńder jınaǵy jaryq kórdi.
Avtordyń jańa jınaǵyna engen óleńderi adamgershilik, parasattylyq, adamdar arasyndaǵy syılastyq taqyryptaryn qamtıdy. Zamandastaryna ún qatqan bir óleńi: «Aqyl menen parasat - janǵa serik, adal atqar isińdi arǵa senip...» dep bastalady.
Aqyn «Soǵys ǵylym bolǵan ba?» óleńiniń shyǵýyna kitaphanadaǵy bir bólim «Soǵys ǵylymdary» degen ataýmen júıelengendigi sebep bolǵan eken.
Osy óleńi:
«Qolda oınasyn qarý emes, ketpender,
Zerttelsin eńbekpen ter tókkender», -
deı kelip: «Soǵysty ǵylym etpeńder!» dep aıaqtalady.
«It tóbelesi» óleńine adamdardyń búgingi qoǵamdaǵy jaǵymsyz áreketteri arqaý bolǵan. Keıbir toıynǵan jandar aýyl nemese qala syrtynda ıt talastyrýdy ádetke aınaldyrǵany jasyryn emes. Osy bir kirme «dástúrge» aqyn jany qarsylyq bildiredi.
«Adamdardyń peıili buzylǵan ba,
Arpalysý bolǵan ba qyzyq janǵa?!
Aıtaqtasa, alabaı aıqasady
Adam úshin batysyp qyzyl qanǵa», -
dep tolǵaıdy avtor. Bul jyr joldary:
«Esi barlar soǵysty toılamaıdy,
(Esi joqtar osyǵan boılamaıdy),
Sol ıtiniń taǵdyryn óz basynan
It ıesi keshem dep oılamaıdy!» -
dep túıindeledi.
Jańa jınaqta Málik Berdi Áliniń oqyrmanǵa oı salatyn ózge de óleńderi bar.