Aqyn Qaırat Jumaǵalıevtiń 80 jyldyǵyna oraı jyr músháırasy jarııalandy

ORAL. QazAqparat - Batys Qazaqstan oblystyq «Oral óńiri» jáne «Prıýrale» gazetteriniń 100 jyldyǵyna jáne belgili qalamger Qaırat Jumaǵalıevtiń 80 jyldyǵyna oraı «Naryn qumyn ańsaǵan Qaırat aqyn» atty respýblıkalyq aqyndar músháırasy jarııalandy, dep habarlaıdy «QazAqparat» HAA tilshisi.

Jyr báıgesine usynylatyn shyǵarmalardyń negizgi taqyryby: «Qazaqtyń Qaıraty» - aqynǵa arnaý,  Naryn men Jaıyq arasy; batystaǵy baspasóz - oblystyq gazetterdiń 100 jyldyǵy; erkin taqyryp.

Óleń dodasyna jas ereksheligine qaramastan, elimizdiń kez kelgen azamaty qatysa alady. Músháıraǵa buryn esh jerde jarııalanbaǵan úsh óleńin usynady. Avtorlar óleńderiniń elektrondy jáne qaǵaz túrindegi nusqasyn jáne tolyq aty-jónderin, ózderi jónindegi málimetterdi qosa jazyp, 2017 jyldyń 1 maýsymyna deıin jiberýge mindetti.

Óleńder aqynnyń sóz tapqyrlyǵy, maǵynasynyń tereńdigi, shýmaq uıqasynyń kúrdeliligi, taqyryptyń ashylýy, oı men qııaldyń ushqyrlyǵy, ıdeıalyq mazmunyna qaraı baǵalanady.

Qazylar alqasynyń sheshimimen músháıra jeńimpazdary anyqtalyp, uıymdastyrý alqasy daıyndaǵan dıplomdar jáne baǵaly syılyqtarmen marapattalady: Bas  júlde - 100 myń teńge (bireý), І, ІІ, ІІІ júlde jáne yntalandyrý syılyqtary.

Óleńderdi myna mekenjaıǵa jiberýge bolady: 090000, Oral qalasy, Muhıt kóshesi 57/1, 2-qabat.«Jaıyq Press» JShS. e-mail: [e-mail]

Aıta keteıik, Qaırat Jumaǵalıev - qazaq ádebıetiniń kórnekti ókilderiniń biri. Ol 1937 jyly Bókeı ordasy aýdanynda dúnıege kelip, 1959 jyly QazMÝ-diń fılologııa fakýltetin bitirgennen keıin Almaty qalasyndaǵy «Jazýshy» baspasynda eńbek etip, bas redaktordyń orynbasarlyǵyna deıin kóterildi. 1985-1992 jyldary Qazaq respýblıkalyq teledıdarynda aǵa redaktor, bas redaktor, 1993-1996 jyldary QR Parlamenti Senatynyń aýdarma-redaktsııalyq bóliminde sektor meńgerýshisi, keńesshi boldy.

2009 jyly Batys Qazaqstan oblysyna qaıta oralǵan aqyn «Jaıyq Press» JShS bas dırektorynyń keńesshisi retinde ómiriniń sońǵy kúnderine deıin qyzmetten qol úzgen joq.

Osynaý jyldar ishinde otyzǵa tarta kitap jazyp, ult ádebıetine orasan zor eńbek sińirdi. Elge belgili óleń-dastandary óz aldyna, álem ádebıetiniń jaýhar shyǵarmalarynan tárjimalaǵan aýdarmalary bir tóbe.

Aq Jaıyq óńirine oralǵannan keıin eseli eńbek etip, «Jaryq dúnıe» atty kitabyn shyǵardy. Osy jınaǵyna keıingi jyldary jazǵan óleń-tolǵaýlary toptastyryldy. Olardyń basym kópshiligi atameken, Aq Jaıyq pen qaıran Narynǵa, osy óńirdiń tarıhı tulǵalaryna arnaldy. Qaırat Jumaǵalıev oblystyń qoǵamdyq-saıası ómirine belsene aralasyp, ásirese, jas býyn ókilderimen jıi kezdesip, urpaq tárbıesine súbeli úlesin qosty.

«Jaıyq Press» JShS budan buryn da aqyn shyǵarmashylyǵyna arnalǵan respýblıkalyq «Armysyń, aınalaıyn, Aq Jaıyǵym!» atty jyr músháırasyn uıymdastyryp, ótkizgen bolatyn.