«Aqyn» fılmi Portýgalııa kınofestıvalinde bas júldege ıe boldy

ALMATY . QazAqparat - Darejan Ómirbaevtyń «Aqyn» fılmi 10-20 qarasha aralyǵynda Portýgalııada ótken Lisbon & Sintra Film Festival 2022 (LEFFEST) kınofestıvalinde bas júldeni jeńip aldy, dep habarlaıdy QazAqparat tilshisi.

Fılm Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy men Ulttyq kınony qoldaý memlekettik ortalyǵynyń qatysýymen túsirildi.

«Aqyn» fılminde tehnologııanyń damý dáýirinde túsiniksiz jáne mańyzdy emes adam bolýdan qorqatyn aqyn týraly baıandalady. Stsenarıı nemis jazýshysy German Gesseniń «Avtorlyq kesh» áńgimesine negizdelgen. Taspanyń túsirilimi Almaty, Almaty oblysynyń qalalary jáne Atyraýda Mahambet Ótemisuly kesenesiniń janynda ótti. Basty keıipkerdi belgili ánshi jáne mýzykant Erdos Qanaev somdady», - dep habarlady «Qazaqfılm» kınostýdııasynyń baspasóz qyzmetinen.

Eske salsaq, fılmniń álemdik premerasy 2021 jyly Japonııadaǵy 34-shi Tokıo halyqaralyq kınofestıvaliniń basty baıqaýynda ótti. Onda fılm «Úzdik rejıssýra» nomınatsııasy boıynsha marapattaldy. Keıin fılm Germanııadaǵy 72-shi Berlın halyqaralyq kınofestıvalinde baıqaýdan tys kórsetildi. Sondaı-aq, «Aqyn» Brazılııadaǵy Olhar de Cinema halyqaralyq kınofestıvalinde «Úzdik fılm» syılyǵyn jeńip alǵan bolatyn.

Qazaqstanda kıno kartına osy jyldyń sáýir aıynda shekteýli prokatqa shyǵaryldy. Sondaı-aq, 14 jeltoqsannan bastap «Aqyn» Frantsııa kınoteatrlarynda prokatqa shyǵatyny belgili boldy.