«Aqyn» fılmi Brazılııadaǵy festıvalde júldege ıe boldy

ALMATY. QazAqparat - Maýsymnyń 1-i men 9-y aralyǵynda Brazılııada ótken Olhar de Cinema halyqaralyq kınofestıvalinde rejısser Dárejan Ómirbaevtyń «Aqyn» fılmi «Basqa kózqarastar» bóliminde «Úzdik fılm» júldesin jeńip aldy, dep habarlaıdy QazAqparat tilshisi.

Sháken Aımanov atyndaǵy «Qazaqfılm» kınostýdııasy taratqan málimetke sensek, festıvaldiń bul bóliminde álemdik kınematografııanyń jańa týyndylary men basqa festıvalderde tanymal bolǵan kartınalar kórsetildi. Oǵan 10 elden nebári 8 fılm usynylǵan .

«Aqyn» fılminiń Qazaqstannan shalǵaıda, sonaý Brazılııada kórsetilip jatqanyna óte qýanyshtymyn. Kıno tobyn osy baǵaly júldemen quttyqtaımyn. Jańa shoýlar men jeńisterdi kútemiz», - dedi Dárejan Ómirbaev.

Sonymen qatar 10-26 maýsym aralyǵynda «Aqyn» fılmi Parıjdegi Jorj Pompıdý atyndaǵy zamanaýı óner murajaıynda kórsetiletin bolady.

Aıta keteıik, «Aqyn» fılmi tehnologııalar damyǵan qazirgi zamanda ónerdiń qoǵamda alatyn orny týraly oı qozǵap, poezııaǵa suranys azaıǵan dáýirde aqynnyń kúıinishi týraly syr shertedi.

Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi.

Fılmniń stsenarııi nemis jazýshysy German Gesseniń «Avtorlyq kesh» atty avtobıografııalyq áńgimesi jelisimen jazylǵan.

Fılmdegi basty róldi «Jigitter» tobynyń ánshisi Erdos Qanaev somdaıdy.