Aqyn Aqushtap Baqtygereeva baýyrlaryn órtten alyp shyqqan 16 jasar qyzǵa qolushyn sozdy
Aqyn qazirgi kezde Bókeı ordasy aýdany Saıqyn aýylynda naǵashy ájesiniń qolynda turyp jatqan Danaǵa arnaıy hat jazdy.
«Aınalaıyn Dana! Seniń anańnan aıyrylyp, basyńnan aýyr kúnderdi ótkizip jatqanyńdy estip, qabyrǵam qaıysyp otyr. Eń jaqyn jannyń meıirim shýaǵyna bólenip, erkelep júrer shaǵyńda taǵdyr osylaısha synaǵan eken. Bastysy, synyp ketpe! Ómir degen osy, qyzym. Baqytty sátterden ǵana turmaıdy. «Ólmektiń artynan ólmek joq» degen sóz qalǵan burynǵydan. Anańnyń arýaǵy úshin, baýyrlaryńnyń jarqyn bolashaǵy úshin ómir súrýdi jalǵastyr. Janyńdy uqpaǵan, qajet kezde qasyńnan tabylmaǵan jandardy jazǵyra kórme. Júregiń muzdamasyn, Dana. Adamdardyń jaqsylyǵyn ǵana jadyńda ustap, qatelikterin kóńilińe almaýdy úırenýiń kerek. Eresek ómirge qadam dál osyndaı betburystardan bastalady. Qazir naǵashy ájeńniń janyńda ekenińnen habardarmyn. Úlken kisi ǵoı, kóńiline demeý, janyna jubanysh bolýǵa tyrys. Sabaǵyńa muqııat bol. Alla buıyrtsa, synaqtan súrinbeı óterińe senemin. Joǵary oqý ornyn tańdap, Oralǵa keler bolsań, janashyr apań retinde qolymnan kelgen kómegimdi kórsetýge ázirmin. Men bastyq ta, baı da emespin. Biraq jany shyryldap jalǵyz qalǵan qazaqtyń bir shynashaqtaı qyzyna qamqor bola alamyn, Alla ǵumyr berse. Qyzym, bolashaǵyń óz qolyńda. Aldaǵy kúnderiń araıly bolsyn deseń, óz-ózińdi qolyńa al, myqty bol! Ǵumyry kelte qaıyrylǵan anańnyń armanyn jalǵap, bolashaqta baýyrlaryń úlgi alar adam bolǵaısyń», dep jazdy hatynda Aqushtap Baqtygereeva.
Aqynnyń osy hatyna qosa joldaǵan zamanaýı planshetti Bókeı ordasy aýdany ákiminiń orynbasary Larısa Qaıyrǵalıeva bastaǵan top Dana Ótebaevanyń úıine baryp, tabys etti.
«Meniń mundaǵy maqsatym – endi ósip kele jatqan jasóspirim qyzdy nazardan tys qaldyrmaý. Anasynan aıyrylý qıyn ǵoı. Soǵan janym ashyp, qoldaý kórsettim. Mektep bitirip, oqýǵa kelse, mindetti túrde kómektesemin. Tipti úıimde de turǵyza alamyn. Ómir boıy qyzdar tárbıesimen aınalysyp kelemin. Buǵan deıin de jetim qyzdarǵa, taǵdyr soqqysyna ushyraǵan jandarǵa qolushyn sozdym. Dana da – solardyń biri. Osyny kórip, basqa qaıyrymdy jandar, oqý oryndarynyń basshylary qoldaý kórseter. Áıteýir Danadaı qyzymyzdy eleýsiz qaldyrmaı, qatarǵa qosyp jibersek, bárimizge de abyroı emes pe!», dedi QazAqparat tilshisine Aqushtap Baqtygereeva.
Eske sala keteıik, budan buryn BQO-da baýyrlaryn órtten alyp shyqqan 16 jasar qyzdyń marapattalǵanyn jazǵan bolatynbyz.
Órt sóndirýshiler jetkenge deıin ózinen kishi úsh baýyryn terezeden shyǵaryp, qutqaryp qalǵan Dana Ótebaeva QR Tótenshe jaǵdaılar mınıstrliginiń «Órtte kórsetken qaısarlyǵy úshin» medalimen marapattalǵan bolatyn.
Oqıǵadan keıin tórt balanyń máselesi jergilikti ákimdik janyndaǵy komıssııa otyrysynda qaralyp, Bókeı ordasy aýdany Saıqyn aýylynda turatyn naǵashy ájesiniń qamqorlyǵyna berilgen edi.
Qazirgi kezde 11-synyp oqýshysy Dana Saıqyn aýylyndaǵy M.S.Babajanov atyndaǵy orta mektepte bilim alyp júr.
