Aqyly joldyń bir baǵytynda qansha jolaq bolýy shart
NUR-SULTAN. QazAqparat – Aqyly joldardyń bir baǵytynda neshe jolaq bolýy mindetti? Redaktsııanyń saýalyna «QazAvtoJol» Ulttyq kompanııasy» AQ basqarma tóraǵasynyń orynbasary Arman Júsipov jaýap berdi, dep habarlaıdy QazAqparat tilshisi.
«Qaıta jańartý júrgizilgennen keıin 1-den 3-ke deıingi tehnıkalyq sanattaǵy (bir baǵytta 1-den 3-ke deıingi jolaq) respýblıkalyq mańyzy bar jol ǵana aqyly bola alady. Qazir jol boıyndaǵy servıs sapasyn jaqsartý, atap aıtqanda janar-jaǵarmaı stansasy, kempıngter, TIR-parkıngter, jol boıyndaǵy dámhanalar, qonaqúıler sanyn arttyrý boıynsha belsendi jumystar júrgizilýde», - deıdi ulttyq kompanııa ókili.
Arman Júnisov óz jaýabynda jol júrý stavkasyna qandaı qyzmet kiretinin de naqtylady.
«Jol júrý aqysynyń stavkalary tek jol júrý qunyn qamtıdy. Basqa aqyly qyzmetterdi usyný ınvestıtsııalyq kelisimderdiń sharttarymen (eger olar bar bolsa) jáne kommertsııalyq básekelestik negizde aıqyndalady», - delingen jaýapta.
Eske salsaq, «QazAvtoJol» ulttyq kompanııasy» AQ basqarma tóraǵasynyń orynbasary Arman Júsipov elimizdiń aqyly joldarynda kimderge jeńildik qarastyrylǵanyn aıtty.
Sondaı-aq, Ulttyq kompanııa ókili aqyly joldardyń baǵasy áli de bolsa ár shaqyrymǵa 1 teńge kóleminde qalatynyn jetkizdi.
Jospar boıynsha 2025 jyly respýblıkalyq joldardyń 44% aqyly bolady.
Bıylǵy 22 sáýirde «QazAvtoJol» Ulttyq kompanııasynyń basshysy aýysqanyn aıta keteıik.
