Aqyly joldarmen júretin júrgizýshilerge RFID-tańbalary tegin beriledi
ASTANA. QazAqparat - Astana men Býrabaı aralyǵyndaǵy aqyly jolda RFID-júıesi testileýden ótkizildi. Bul týraly Astanada ótken baspasóz máslıhatynda «Qazavtojol» UK» AQ bıznesti damytý jónindegi basqarýshy dırektory Rýstam Isaev málim etti, dep habarlaıdy QazAqparat.
«RFID - júıesine toqtalyp ótkim keledi. Bul tańbalar kóliktiń aldyńǵy áınegine japsyrylady. Atap aıtqanda, Astana men Býrabaı aralyǵyndaǵy aqyly jolda osy júıeni testileýden ótkizdik. Bul júıe táýliktiń kez kelgen ýaqytynda kólik týraly málimetti tolyqtaı sáıkestendirýge jol ashady. Osy oraıda jol aqysy esepteletin beketterde avtokólikti aıtarlyqtaı jyldam tanýǵa múmkindik beriledi. Kólikter tólem alynatyn beketterden esh kedergisiz ótedi», - dedi Isaev.
Onyń sózine qaraǵanda, aldaǵy jyldan bastap atalǵan japsyrmaly tańbalardy taratý jumystary iske asyrylady. Birinshi kezekte aqyly ýchaskeler aýmaǵyna jaqyn ornalasqan turǵyndarǵa beriledi. Sodan keıin qalǵan júrgizýshilerge tapsyrylady. Atalǵan RFID - tańbalar júrgizýshilerge tegin taratylady.
«Bıyl joldardyń úsh ýchaskesinde aqyly júıe engiziledi. Osy jumystar aıaqtalǵannan keıin, bul tańbalar taratyla bastaıdy. Birinshi kezekte, abonement retinde tańbalardy jergilikti turǵyndarǵa beriledi. Osyndaı belgisi bar kólik tólem beketinen ótken kezde, kólikke tıesili shottan qajetti soma alynyp otyrady. Máselen, qazirgi kezde Býraıbaıdan Astanaǵa kelgen ýaqytta qurylǵylar avtokólik nómirin tanyǵansha birshama ýaqyt toqtap turý kerek. Al RFID -tańbasy bar kólikterge qatysty bul sharalar aıtarlyqtaı jyldam júredi. Avtomobıl beketke (shlagbaýmǵa) toqtamastan óte shyǵady», - dep túsindirdi.
RFID - júıesi - ol ishinde chıp ornatylǵan shaǵyn ǵana zattańba ispettes. «RFID - Radio Frequency Identification», ıaǵnı «radıojıilikti ıdentıfıkatsııa» kezinde ózara málimet almasýǵa bolady.
Ondaıda arnaıy qurylǵylar RFID-belgilerge salynǵan aqparatty qashyqtyqta oqı alady. Sóıtip, avtomatty túrde aqy alýǵa múmkindik bar.
