Aqyly joldardy kútip-ustaýǵa 40-50 mlrd. teńge qajet - Avtomobıl joldary komıteti
ASTANA. 30 mamyr. QazAqparat - Aldaǵy ýaqytta bizge aqyly avtojoldardy kútip-ustaýǵa 40-50 mlrd. teńgege jýyq qarajat qajet bolady.
Bul týraly búgin «Astana - Býrabaı» avtobanynyń aqyly júıesin tanystyrý sharasy barysynda QR Kólik jáne kommýnıkatsııa mınıstrligi Avtomobıl joldary komıtetiniń tóraǵasy Zamır Saǵynov málim etti.
Komıtet tóraǵasy atap kórsetkendeı, aǵymdaǵy jyly «Astana - Qaraǵandy» jáne «Almaty - Qapshaǵaı» joldarynyń qurylysy bastalsa, kelesi jylda «Astana - Pavlodar» avtojolyn salý jumystary qolǵa alynady. «Osynyń barlyǵyn kútip-ustaýǵa 40-50 mlrd. teńgedeı aqsha qajet bolady», - deıdi Z.Saǵynov. Onyń aıtýynsha, búginde kólik salyǵynan túsetin qarajattyń jalpy sommasy 30 mlrd. teńgeni qurap otyr. Bul qarjy joldardy kútip-ustaýǵa jetkiliksiz. Sol sebepti qalǵan 10-20 mlrd. teńgeni avtojoldardyń aqyly júıeleri arqyly jınaý josparlanǵan.
