Aqyly joldardan túsken qarjy qaıda ketip jatyr – QazAvtoJol jaýaby
«Ótken jyldyń qorytyndysy boıynsha aqyly joldardan 8 mlrd teńge tóńireginde qarjy tústi. Tutynýshylar tarapynan aqyly joldan túsken tabys qaıda ketip jatyr? degen saýal týyndap jatady. Aqyly joldardan túsken aqy, sol joldardy kútip baptaý men sapasyn arttyra túsýge jumsalady. Mysaly, bir aqyly jol beketin alaıyq. Ol beketti foto jáne beınebaqylaý kamerasymen qamtý, sondaı-aq beketke elektr jelisi men ınternet tartý máselesi bar. Odan bólek, beket aýmaǵynda meteostantsııa qoıý máselesi qaralyp jatyr. Ol degenimiz ne? Ózderińiz bilesizder, elimizdiń soltústik aýmaǵynda qystygúni bir oblystyń ózinde aýa raıy ártúrli bolyp jatady. ıAǵnı Aqmola oblysynyń bir aýdanynda boran bolsa, basqa aýdanda aıaz soǵyp turady. Biz búginde aýa raıyn ózimiz anyqtap, jetkizip otyramyz. Aldaǵy ýaqytta ol jumys meteostantsııanyń kómegimen avtomatty túrde anyqtalatyn bolady», - dedi Sáken Ádilbekov «QazAvtoJol» ulttyq kompanııasy uıymdyrǵan baspasóz týry barysynda.
Onyń aıtýynsha, aqyly joldardan túsken qarjynyń 80 paıyzy sol joldardy damyta túsýge jumsalady.
«Ótken jyldyń qarasha aıynda elimizdegi aqyly joldardyń qatary taǵy 7 jol ýchaskesimen tolyqty. Árıne, joldy aqyly etkennen keıin, onyń sapasy men ınfraqurylymy soǵan sáıkes bolýy kerek. Mine, aqyly joldan túsken qarajat jol sapasyn arttyrýǵa jumsalyp jatyr. Árıne, joldan túsken tabys boıynsha salyq tólenedi. Degenmen túsken qarjynyń deni joldy kútip-baptaýǵa baǵyttalady», - deıdi ol.
Buǵan deıin S.Ádilbekov elimizdegi aqyly joldardyń sapasy men jol boıyndaǵy ınfraqurylym damı túsetinin aıtqan bolatyn.