Aqyly joldarda RFID júıesi bolady
ASTANA. QazAqparat - Qazaqstandaǵy aqyly joldarda avtomatty túrde tólem aýdarý júıesi bolady, dep habarlaıdy QazAqparat tilshisi.
Investıtsııalar jáne damý mınıstri Jeńis Qasymbektiń aıtýynsha, baılanyssyz tólem alý úshin RFID-belgiler qoldanylatyn bolady. Aıta ketken jón, «RFID - Radio Frequency Identification», ıaǵnı «radıojıilikti ıdentıfıkatsııa» kezinde ózara málimet almasýǵa bolady. Ondaıda arnaıy qurylǵylar RFID-belgilerge salynǵan aqparatty 20 santımetrden bastap 300 metrge deıingi qashyqtyqta oqı alady. Sóıtip, avtomatty túrde aqy alýǵa múmkindik bar. RFID kádimgideı domofon sııaqty jumys isteıdi. «Budan bólek, biz beınekameralardy, meteorologııalyq ólsheý quraldaryn, kólik júrgizýshileri úshin aqparattyq taqtalardy ornatý jumystaryn atqaryp jatyrmyz. Sosyn júrip kele jatqan kólik quraldaryn ólsheýdi jáne jol júrý ruqsatyn elektrondy tirkeýdi qamtamasyz etetin avtomattandyrylǵan arnaıy ólsheý quraldary bolady. Atalǵan shara avtomobıl joldaryn kútip ustaýǵa oń áserin tıgizedi. Bıyl osyndaı 12 júıeni iske qosamyz dep otyrmyz. Al 2020 jylǵa deıin ol qurylǵylardyń sany 46-ǵa jetedi degen jospar bar», - dedi J.Qasymbek Úkimettiń búgingi otyrysynda.
Mınıstrdiń aıtýynsha, aldaǵy ýaqytta «Astana - Temirtaý», «Almaty - Qapshaǵaı» jáne «Almaty - Qorǵas» ýchaskelerinde aqyly júıe engiziledi. «Sonymen qatar, jalpy uzaqtyǵy 5 myń shaqyrym bolatyn 13 ýchaskede aqy alý júıesin jobalaý jumystary aıaqtalýǵa jaqyn. 2020 jylǵa deıin 16 jolda aqyly júıesi engiziletin bolady», - dep atap kórsetti J.Qasymbek.
foto:alau.kz
