Aqyly joldar jeńil kólikter úshin tegin bolýy yqtımal
ASTANA. QazAqparat - QR Investıtsııalar jáne damý mınıstrligi aqyly joldardy jeńil kólikter úshin tegin etýdi josparlaýda. Bul týraly QR Investıtsııalar jáne damý vıtse-mınıstri Jeńis Qasymbek málim etti.
«Aqyly joldar boıynsha búgin másele kótermedik, degenmen men úlken habar aıtqym kelip otyr. Astana-Býrabaı tájirıbesinen kórip otyrmyz, 80-85 paıyz paıdany júk kólikteri men avtobýstar túsiredi. Biz oılap otyrmyz, bolashaqta aqyly joldarda jeńil kólikterge aqy engizbeıtin shyǵarmyz. Olar tegin ótedi. Tek júk kólikterinen aqy alatyn bolamyz», - dedi J.Qasymbek búgin QR Parlamenti májilisindegi «Nur Otan» partııasy fraktsııasynyń bıýdjettik qarajattardyń tıimdi jumsalýyn qadaǵalaý taqyrybyna qatysty otyrysynda.
«Menińshe, bul qısyndy bolar edi. Eger depýtattar kelesi sessııada qoldasa, zańnamaǵa tıisti ózgerister engizýge daıynbyz», - dep atap ótti ol.
