Aqyly polıtsııa týraly alypqashpa áńgime negizsiz - Astana polıtsııasy
ASTANA. QazAqparat - Astana qalasynyń jergilikti polıtsııasynyń basshysy Baqytjan Malybaev polıtsııanyń aldaǵy ýaqytta aqyly bolatyny týraly alypqashpa áńgimeniń negizsiz ekenin málim etti, dep habarlaıdy «QazAqparat»HAA tilshisi.
OKQ-da ótken baspasóz máslıhaty barysynda Baqytjan Malybaevqa «aqyly polıtsııa degen bola ma?» degen suraq qoıylǵan bolatyn.
«Aqyly polıtsııa týraly shynymdy aıtsam, birinshi ret sizden estip turmyn. Menińshe, bul sandyraq sóz. Eshqashan olaı bolmaıdy. Bizde bári zań aldynda birdeı. Bizdiń buıryq boıynsha qońyraý kelip tússe, quqyq qorǵaýshy 70 mınýttyń ishinde jetýi tıis», - deıdi Baqytjan Malybaev.
Jergilikti polıtsııa bastyǵy sonymen birge polıtsııa kóp jaǵdaıda keshikpeýge kúsh salatynyn aıtyp ótti.
«Bizde jeke quramda jetispeýshilik seziledi. Sebebi,kúnine 1200-1500 qońyraý kelip túsedi. Tártip saqshylary barynsha ýaqtyly jetýge tyrysady. Ýaqtyly jetpegender bolsa biz árbireýi boıynsha jeke is júrgizetin bolamyz. Eger bul baǵytta quqyq qorǵaýshynyń kinási anyqtalyp jatsa, oǵan qatysty tártiptik jaza qoldanylatyn bolady», - deıdi Baqytjan Malybaev.
