Aqyly olımpıadaǵa oqýshylardyń qatysýyn mektep májbúrleı almaıdy - mınıstrlik

NUR-SULTAN. QazAqparat – Aqyly bilim berý olımpıadalaryna oqýshylardyń qatysýyn mektep ákimshiligi májbúrleı almaıdy. Bul týraly QR Bilim jáne ǵylym vıtse-mınıstri Sholpan Karınova aıtty, dep habarlaıdy QazAqparat tilshisi.

«Jalpy, olımpıadalarǵa qatysý – ol erikti tańdaý. Árbir ata-ana balasynyń aqyly jarystarǵa qatysýyn nemese qatyspaýyn ózi anyqtaýy tıis. Bul rette pedagogtardyń, mektep ákimshiliginiń, ádistemelik qyzmetterdiń osylardy uıymdastyrýǵa nemese olarǵa qatysýǵa májbúrleýge eshbir quqyǵym joq. Osy oraıda Bilim jáne ǵylym mınıstrligi taǵy bir eskertý aıtady, eger májbúrleý faktileri tirkelse, mınıstrliktiń óńirlik departamentteri sapany qamtamasyz etý qyzmetterin atqarady. Sondyqtan olarǵa osy máseleler boıynsha júginýge bolady», - dedi Sh. Karınova Ortalyq kommýnıkatsııalar qyzmetinde.

Aıta keteıik, Bilim jáne ǵylym mınıstrligi uıymdastyratyn olımpıadalar oqýshylar úshin aqysyz negizde bolady.

Sonymen qatar qazirgi kezde qazaqstandyq bilim berý naryǵynda jekemenshik kásiporyndar men uıymdar da osy qyzmetterdi aqyly usynyp keledi.

«Biraq Bilim jáne ǵylym mınıstrliginiń bul aqyly jarystarǵa eshqandaı qatysy joq ekenin atap ótemin. Sondyqtan balalar men muǵalimder, mektepter ártúrli olımpıadalar men konkýrstarǵa oqýshylardyń qatysýyn tańdaǵan kezde muqııat bolýyna keńes beremiz», - dedi Sholpan Karınova.