Aqyly bólim stýdentteri de jataqhanaǵa ornalasa alady
ASTANA. QazAqparat - Qazaqstanda aqyly bólimde oqıtyn joǵary oqý orny stýdentterine de jataqhanadan oryn beriletin bolady. Bul týraly búgin Úkimet úıinde ótken baspasóz máslıhatynda QR Bilim jáne ǵylym vıtse-mınıstri Bıbigúl Asylova aıtty, dep habarlaıdy QazAqparat tilshisi.
Onyń aıtýynsha, elimizdiń Bilim jáne ǵylym mınıstrligi aqyly bólimde oqıtyn stýdentterdi de jataqhanamen kepildi qamtamasyz etý úshin elimizdiń «Bilim týraly» Zańyna ózgertýler engizgen. Búginde bul ózgeristerdi Májilis maquldap, qazirgi ýaqytta Senattyń qaraýynda jatyr.
«Zańnamadaǵy jańa ózgeristerge sáıkes aqyly nemese tegin oqýyna qaramastan jataqhanadan oryn alýǵa kepil beriledi. Búgingi kúnge deıin bul norma memlekettik bilim berý tapsyrysy boıynsha oqıtyn balalarǵa ǵana qatysty bolatyn. Endigi ýaqytta oqý formasyna qaramastan jataqhanadan oryn alýǵa memleket kepildik beredi. Menińshe, bul negizgi normalardyń biri», - dedi vıtse-mınıstr.
Osy oraıda Bıbigúl Asylova atalǵan zań jobasyndaǵy ózgertýlerdi Parlament qabyldaıtyndyǵyna senim artatynyn aıtty.
«Búgingi kúni elimizde óńirlerden kelip bilim alatyn stýdentterdiń sany 204 myń adamdy quraıdy. Onyń 101 myńy jataqhanany qajet etedi. Al búgingi kúni jataqhanamen stýdentterdiń shamamen 66 paıyzy qamtamasyz etilip kelgen bolatyn», - dedi ol.
Buǵan deıin stýdentterge jataqhana salý úshin jergilikti ákimdikter 134 jer telimin bólgenin habarlaǵan bolatynbyz.
