Aqyly avtojoldar máselesinde sol óńirdegi halyqtyń tólem qabileti de eskerilýi kerek - S. Nurǵısaev

ASTANA. QazAqparat - Aqyly joldar máselesinde sol óńirdegi halyqtyń tólem qabileti de eskerilýi kerek. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Parlament Májilisiniń depýtaty Serikbaı Nurǵısaev málim etti.

«Jalpy, avtojoldar máselesinde halyqtyń tólemge qabilettiligin de eskerý kerek. Máselen, búgingi tańda Kókshetaý men Ońtústik Qazaqstan oblysy boıynsha ortasha jalaqy deńgeıi men batys óńirleriniń tólemge qabilettiligin salystyrýǵa kelmeıdi. Bul rette avtojoldarǵa aqyly júıeni engizý negizinen olardaǵy kólikter aǵynyna da qatysty bolýy tıis sekildi», - dedi Májilis depýtaty.

Onyń aıtýyna qaraǵanda, qazirgi tańda Astana-Kókshetaý baǵytyndaǵy avtoban tranzıttik emes, al Reseıge baratyn avtojoldardyń basym bóligi tranzıttik bolyp tabylady. Sondyqtan da, olarǵa baǵany kóterýge múmkindik bar. «Degenmen, barlyǵyn ýaqyt kórsetedi, qazir bul másele talqylanyp jatyr», - dedi brıfıng barysynda depýtat S. Nurǵısaev.

Eske sala keteıik, Qazaqstanda aqyly avtojoldar alǵash ret 2013 jyly «Astana-Shortandy» baǵytynda engizilgen bolatyn. Al jospar boıynsha «Almaty-Qapshaǵaı» avtobany 2017 jylǵa taman aqyly bolady.