«Aqyldy tehnologııalar» aýylǵa barady
NUR-SULTAN. QazAqparat - Astana hub halyqaralyq IT startaptar tehnoparkinde Huawei jáne «Bılaın» kompanııalarynyń birlesken jobasy tanystyryldy, dep habarlaıdy QazAqparat tilshisi.
Symsyz baılanys arqyly adam ómirin jeńildetip, energetıkalyq shyǵyndardy únemdeýge baǵyttalǵan joba tirshiliktiń barlyq salasyn qamtymaq.
«Bılaın» baılanys operatorynyń IoT departamentiniń dırektory Tımofeı Kostogryzovtyń aıtýynsha, «NB-IoT» standartyn engizýge Qazaqstannyń memlekettik organdary da, kásipkerlik nysandar da qyzyǵýshylyq tanytyp otyr.
«Qazaqstannyń aýmaǵy óte úlken bolǵanymen, adam sany az. Osynshama aýmaqty baqylaýda ustap, óndiris pen sharýashylyqtyń, iri-iri ken oryndarynyń bárine monıtorıng júrgizý qıyn. Túrli tehnogendik apattardyń aldyn alý úshin de udaıy monıtorıng júrgizip otyrý qajet. Biz usynatyn joba sol árekettiń bárin qoldanystaǵy tásilderden áldeqaıda arzan ári ońtaıly uıymdastyra alady. Qarapaıymdap aıtqanda, bul tásil eldiń tutas aýmaǵyn sensorly tetiktermen qamtýdy kózdeıdi. Ony kez kelgen jerge ornatýǵa bolady. Óıtkeni elektr jelisine jalǵaý mindetti emes. Atalmysh tetikter baqylaý aýmaǵyndaǵy kez kelgen ózgeristi ortalyq bazaǵa der kezinde joldap otyrady. Muny qazirgi «Aqyldy qala» jobasynyń jalpy el aýmaǵyna taralýy dep aıtýǵa bolady», - deıdi Tımofeı Kostogryzov.
«Bılaın» ókili Qazaqstan bul tehnologııalardy turǵyn úı-kommýnaldyq sharýashylyǵyna, túrli nysandardyń jaǵdaıyn monıtorıngileýge, tutas ekologııalyq ahýalǵa monıtorıng júrgizýge, tehnogendik táýekelderdiń aldyn alý úshin paıdalanýǵa nıetti ekenin aıtady.
«Atalmysh aqyldy tehnologııa aýyldy da jatsynbaıdy. Qazir mal úıirleri men tabyndaryn «chıp» arqyly baqylaý keń qoldanysqa enýde. Bizdiń tehnologııa sonyń áldeqaıda jetilgen túrin usyna alady. Bizdiń sensorly tetik arqyly maldyń qaıda júrgenin bilip qana qoımaı, denedegi temperatýrasyn baqylaýǵa da bolady. Osynyń arqasynda tabyn ishindegi sıyrdyń aýrýyn der kezinde anyqtap, ózgelerge indet juqpaýyn qadaǵalaýǵa bolady. Qazir robottandyrylǵan fermalar osy júıeniń arqasynda saýyn kólemin ulǵaıtyp, ónimdilikti arttyryp otyr», - deıdi maman.
Aldaǵy bes jylda Qazaqstan aýmaǵynda IoT jelileri tartylmaq. Tımofeı Kostogryzovtyń aıtýynsha, qurylys jumystary qazirdiń ózinde bastalyp ketken.
«Aldaǵy eki jylda Qazaqstannyń negizgi qalalaryn qamtyp úlgersek degen jospar bar. Onyń arqasynda Smart city baǵdarlamalyq kesheni men uıaly baılanystyń burynǵydan da qolaıly deńgeıi usynylatyn bolady. Qazirgi tańda densaýlyq saqtaý, aýyl sharýashylyǵy, tsıfrlandyrý jáne ındýstrııa mınıstrlikterimen birlesken jobalar jasaý boıynsha kelissózder júrip jatyr», - deıdi Tımofeı Kostogryzov.
