«Aqyldy» shamdar shyǵyndy 60 paıyzǵa azaıtýǵa múmkindik beredi - Astana ákimdigi
ASTANA. QazAqparat - Astana qalasynyń ákimdigi qolǵa alyp jatqan «Kósheni aqyldy jaryqtandyrý» jobasy kóshe jaryǵyna ketetin shyǵyndy burynǵydan góri 60 paıyzǵa azaıtýǵa múmkindik beredi, dep habarlaıdy «QazAqparat» HAA tilshisi.
Bul týraly Astana qalasynyń ákimdiginde «Tsıfrlyq Astana: qazirgi jaǵdaıy men keleshegi» taqyrybynda ótken baspasóz máslıhaty barysynda qalalyq Investıtsııalar jáne damý basqarmasynyń basshysy Álisher Ábidhalyqov málim etti.
«Olar elektr energııasyn az mólsherde tutynady. Jaryqtandyratyn túsi de ózgeshe. «Kósheni aqyldy jaryqtandyrý» jobasy joǵary tehnologııaly qurylǵylardy qoldaný arqyly júzege asyrylady. Birinshiden, jańa úderis shyǵyndy burynǵydan góri 60 paıyzǵa azaıtady. Buǵan qosa jaryq shamy ilinip turǵan baǵannyń ózi ozyq tehnologııanyń bir elementi. Ol ákimdikke aýqymdy mólsherde aqparattardy jınaýǵa, atap aıtqanda aýa raıyna, ekologııaǵa, shý qurylǵylaryna, kólikterdiń trafıkteri boıynsha málimet alýǵa kómek beredi», -deıdi Álisher Ábdiqadyrov.
Búgingi kúnge deıin elordada 600 sham aýystyrylǵan. Jańa shamdardyń 6 aıdan 15 jylǵa deıin qyzmet etýge qaýqary bar.
«Naqtyraq aıtqanda, Qonaev - Máńgilik el, Dostyq - Nurly jol, Máńgilik elden áýejaıǵa deıingi joldarǵa jańa shamdar ornatyldy. Ol jaqta kósheniń qalaısha jaryqtandyrylǵanyn nıet bildirgender baryp kóre alady. Jalpy alǵanda, qala boıynsha 25 myń shamdy aýystyrý kerek. Bul jumysty biz memlekettik-jekeshelik seriktestik syzbasy arqyly iske asyrýdy josparlap otyrmyz. Jýyq arada konkýrs jarııalanady», - deıdi ol.
