«Aqyldy qala» tehnologııalary boıynsha Astanada 5 ınnovatsııalyq joba iske asyrylýda
Olar - densaýlyq saqtaý, bilim berý jáne joǵary tehnologııalyq óndiristerdi uıymdastyrý salalarynyń jobalary, dep habarlady pm.kz saıty.
Osy jobalardyń biri qoǵamdyq oryndarda symsyz WiFi tehnologııasynyń kómegimen Internetke qosylýǵa múmkindik beretin qalalyq jeli qurýǵa baǵyttalǵan «OpenWiFi» jobasy. «OpenWiFi» ulttyq jelisi Astana turǵyndary kóp jınalatyn qoǵamdyq oryndardy qamtıtyn bolady.
«Aqyldy qala» tujyrymdamasynyń aıasyndaǵy kezekti joba - «E-jedel járdem» jobasy. Bul jobanyń aıasynda jedel járdem kólikterin IP-telefonııa, GPS-navıgatsııa jáne medıtsınalyq taldaý anyqtamalyǵy bar planshettermen jaraqtaý qarastyrylǵan.
Taǵy bir joba mektepterdegi qaýipsizdik júıesin jaqsartýǵa negizdelip otyr. «Bolashaqtyń mektebi-búgin» jobasynyń aıasynda elorda mektepterinde «oqýshynyń elektrondyq kýáligi» atty keshendi qaýipsizdik júıesi engizilmek. Oqýshylar elektrondyq kýálikter beriledi, al ata-analar sol kýálikterdiń kómegimen balalarynyń qaı jerde júrgenin qadaǵalaı alady. Oǵan qosa, mektepter qaýipti saıttardy fıltratsııalaıtyn ınternetpen jabdyqtalady jáne oqýshylarǵa arnalǵan áleýmettik saıt engiziledi. Qazirgi tańda bul joba ilki rejımde № 54 mektepte synaqtan ótkizildi, aldaǵy ýaqytta taǵy 10 mektepte qolǵa alynbaq.
«Smart Astana» tehnologııasynyń negizinde sondaı-aq joǵary tehnologııalyq jabdyqtarmen jaraqtalǵan «3D tehnologııa quzyretindegi ortalyq» iske qosylyp otyr. «3D tehnologııa quzyretindegi ortalyqta» ınjenerlik jelilerdi ǵana emes, sáýlet qurylystary men ónerkásiptik kásiporyndardy 3D-formatta jobalaýǵa múmkindik beretin zerthana jumys isteıdi.
Al besinshi joba - Astanada joǵary tehnologııalyq mashına jasaý ortalyǵy men stanok jasaý salasyn damytýdyń bazasyn qurýǵa negizdelip otyr. Injenerlik-tehnıkalyq personal joǵary tehnologııalyq stanok jabdyqtarynda jumys isteýge úırenetin bolady. Qazirgi tańda «Qazaqstan-cheh tehnologııalyq ortalyǵy» birlesken kásipornyn qurý máselesi boıynsha «Astana Innovations» AQ, «Astana» áleýmettik-kásipkerlik korporatsııa» AQ jáne Chehııanyń Stanok jasaýshylar qaýymdastyǵynyń arasynda ózara yntymaqtastyq týraly memorandým jasaldy.
Joǵaryda atalǵan ınnovatsııalyq jobalarmen «Astana Innovations» kompanııasy aınalysýda.«Smart Astana» jobasyna eýropalyq «aqyldy» qalalardyń damý modeli negiz retinde alynyp otyr.
