«Aqyldy qala» kýrsy qalalarymyzdyń básekege qabilettiligin arttyrmaq - sarapshy

ALMATY. QazAqparat - Prezıdent kórsetken aqyldy qala kýrsy qalalarymyzdyń básekege qabilettiligin arttyrmaq. Osyndaı oıymen búgin Almatyda ótken jıyn barysynda Qazaqstannyń FınTeh qaýymdastyǵynyń atqarýshy dırektory, qoǵamdyq keńes múshesi Erlan Smaılov bólisti, dep habarlaıdy QazAqparat tilshisi.

Sarapshynyń aıtýynsha, Smart City kontseptsııasy bar qala álemdik dárejede básekege qabiletti qalalar  qataryna ótedi.

 «Aqyldy qalalar boıynsha Prezıdent kórsetken baǵyt maksımaldy básekege qabilettilik týdyrady. Sebebi  jer betindegi adamzattyń barlyǵy jaqyn arada tek úlken qalalarǵa shoǵyrlanady. ıAǵnı jaqyn arada báseke megapolısterdiń arasynda bolady. Qaı qala jaıly, taza, ekologııalyq turǵydan qaýipsiz, sol qalalarǵa adamdar kóp barady. Aqyldy qala postýlaty úsh taǵanǵa negizdeledi. Birinshiden, aqyldy qala - turǵyndarmen dıalogqa bara alatyn qala. Qala bıliginiń ashyqtyǵy, qoǵammen baılanysy damýy kerek. Sonymen qatar, qaladaǵy barlyq qyzmetter júıeleriniń bir júıege birigýi - aqyldy qalanyń bir kórinisi. Sondaı-aq, zamanaýı tehnologııalar kóp ról oınaıdy. Máselen Barselona kólik, týrıstik salaǵa basymdyq berse, Kopengagen qalasy jaqynda ekologııaǵa zııandy zat shyǵarmaıtyn qalaǵa aınalady», - dedi Erlan Smaılov.

Onyń aıtýynsha, bul tujyrymdama óte kóp resýrsty talap etedi. Aqyldy qalaǵa aınalý - búgingi kúnniń isi emes.

«Smart Sıtı kontseptsııasy kóp ınvestıtsııany, kóp ýaqytty, ıntellektýaldyq resýrstardy talap etedi. Alaıda, qazir bastasaq, Almatyda bul jańalyqtyń aýyly alys emes», - dedi sarapshy.

Aıta ketý kerek, 9 qańtarda Memleket basshysy Nursultan Nazarbaev «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty kezekti Joldaýyn jarııalaǵan bolatyn.