Aqyldy adamdardyń ǵashyq bolýy qıyn
ASTANA. QazAqparat - Adam janyna bar jaǵdaı jasalǵanymen, júregi bos bolsa, ózin keýdesi qańyrap turǵandaı sezinedi. Talaıdy kúıdirip-jandyrǵan mahabbat aýylyna aqyldylar abaılap aıaq basady. Kóldeneń kezdesken kók attynyń jetegine ere bermegendikten, sýyq ta qarańǵy jalǵyzdyq kóshesin uzaq aralaıdy, dep jazady massaget.kz.
Iá, solaı! Olardyń biri ózi shyn qalaýymen jany jalǵyzdyqta jaı tabatyn bolsa, endi bireýleri eriksizden jalqy júrý jolyn tańdaıdy. Kim kóringenmen birge bolǵansha, qıyn bolsa da, osy joldy artyq sanaıdy.
Aqyldy adamdar syrt qaraǵanǵa shaǵylýy qıyn jańǵaqqa uqsaıdy. Óıtkeni olar oıyndaǵyny aqtaryp, jaı-kúıin jaıyp sala almaıdy. Syr sandyǵynyń qulpyn muqııat asha alǵan janǵa ǵana aqyryndap ish tartýy yqtımal. Ár qadamyn ańdap basyp, ár sózin oılanyp aıtatyndar úshin birden ashylysyp, shúıirkelesip ketýi qıyn.
Olar buryn bastan ótkergen oqıǵalaryn da esten esh shyǵarmaq emes. Ómirdiń ár mınýtynan sabaq alyp, kezikken kisiden tájirıbe jınaǵan. Sondyqtan da qatelikterdi qaıtalamaýǵa tyrysyp, on oılanyp, júz tolǵanady.
Olar óziniń de, ózgeniń de sezimin sana sarabynan ótkizedi. Júreginiń ámirine qaraǵanda, aqylynyń buıryǵyna basymdyq beredi. Kezikken jannyń jaqsyly-jamandy qasıetterimen tolyq qabyldaı alamyn ba dep uzaq oılanady. Táýekeldi de jeti ólshep, bir kesedi.
Aqyldy adamda da júrek bar. Sezimniń desi basym bolsa, ne kúıge de kónedi...
