Aqyldastar alqasy jerleý rásimi men toıdy nesıege jasaýdy toqtatýǵa shaqyrdy
Alqaly jıynǵa oblys ákiminiń orynbasary Ulasbek Sádibekov pen oblystyq, qalalyq, aýdandyq ardagerler keńesteriniń tóraǵalary qatysty. Sondaı-aq zııaly qaýym ókilderi men din salasynyń qyzmetkerleri, tóbe bıler men úkimettik emes uıymdardyń ókilderi shaqyryldy. Basqosýda din men dástúrdiń arasyna jik salyp júrgen keıbir toptardyń áreketterine qarsy turý jaıy sóz boldy. Máselen, óz otandastarynyń, baýyrlarynyń arasynda alaýyzdyq týdyrý arqyly ortaǵa teris áser qalyptastyryp júrgenderdiń qoǵamǵa qaýip tóndirip kele jatqany áńgime arqaýyna aınaldy. Óz kezeginde oblys ákiminiń orynbasary ult bolyp qalyptasqaly beri jınaqtalǵan san ǵasyrlyq qundylyqtardy, dástúrli dindi keıbireýlerdiń teriske shyǵarýǵa umtylǵany orynsyz ekenin jetkizdi.
«Qazaq halqynyń ulttyq uǵymymen ushtasqan Islam dini eshýaqytta dástúrdi teriske shyǵarǵan emes. Sondyqtan da musylman qaýymyna jatatyn árbir ulttyń ult bolyp qalyptasýyndaǵy salt-dástúrleri men ádet-ǵuryptaryn dinnen bólek, dinı nanym-senimderinen ajyratyp, birin ekinshisinen oqshaýlap qaraý múmkin emes», - dedi Ulasbek Sádibekuly.
Sondaı-aq, jıynda Qazaqstan musylmandary dinı basqarmasy tarapynan dástúrli dinniń qundylyqtaryn halyq arasynda nasıhattap, din men dástúr baılanysyn nyǵaıta túsý jolynda atqarylǵan ıgi ister aıtyldy. Alaıda, atalǵan máseleni sheshýge bul sharýalar azdyq etetini, onymen qoǵam bolyp kúresý kerek ekenin aıtty jınalǵandar.
Máselen, qoǵamdaǵy dinı rásimder men joralǵylardy júrgizý barysynda ysyrapshyldyqqa jol bermeý, jerleý rásimderi men toı jıyndarǵa nesıe alýdy toqtatý máselesi aıtyldy. Zırattardy kútip ustaý máselelerimen zııaly qaýym ókilderiniń aınalysýy kerektigi sóz boldy. Sonymen qatar Qazaqstan musylmandary dinı basqarmasy bekitken «Janaza jáne dinı rásimder» kitabyn kómekshi qural retinde paıdalaný usynyldy.
