Aqylbek Kúrishbaev: Joldaýda aýyl sharýashylyǵynyń álsiz tustary dál anyqtalǵan
«Qazir elimizdi daǵdarystan keıin damytý jolynda teńdestirilgen saıasattyń qajettigi burynǵydan da mańyzdyraq. Meniń oıymsha, ekonomıkadaǵy túpki nátıjege, halyqtyń ál-aýqatyn arttyrýǵa baǵyttalǵan dál osyndaı baǵdarlamany el Prezıdenti Qasym-Jomart Toqaev óziniń Joldaýynda jarııa etti. Prezıdenttiń ónerkásiptik saıasatty qalyptastyrý jónindegi paıymyn erekshe atap ótkim keledi. Aýyl sharýashylyǵynyń álsiz tustary dál anyqtalǵan. Bıylǵy jyly Úkimettiń fermerlerdiń onsyz da az tabysyn tyıym salý sharalarymen tómendetpeýi óte mańyzdy. Aýyl sharýashylyǵy mınıstrligi aýyl sharýashylyǵyn damytýmen, fermerlerdiń kiristerin arttyrýmen aınalysýy kerek», - dedi A. Kúrishbaev.
Halyq qalaýlysynyń aıtýynsha, Prezıdent azyq-túlik taýarlarynyń baǵasyn baqylaý boıynsha memlekettik organdardyń jaýapkershiligin ajyratý kerektigin durys aıtty.
Jáne onyń málimdeýinshe, Joldaýda aıtylǵan bıologııalyq qaýipsizdik jónindegi ulttyq júıe qurý elimiz úshin strategııalyq mańyzdy sheshim.
«Memleket basshysy tsıfrlyq tehnologııalardy endirý arqyly sý problemalaryn sheshý qajettigine basa nazar aýdardy. 2025 jylǵa qaraı elimizdiń barlyq halqy sapaly aýyz sýmen qamtamasyz etiletini mańyzdy. Meniń oıymsha, qoǵam Prezıdenttiń eldegi eń tómengi jalaqyny 60 myń teńgege deıin, ıaǵnı 30%-ǵa deıin kóterý týraly bastamasyn jaqsy qabyldady. Bul bizdiń mıllıondaǵan azamattarymyzdyń ómir súrý deńgeıin arttyrýǵa baǵyttalǵan Memleket basshysynyń oń sheshimi», - deıdi ol.
Odan bólek, depýtat ǵylymı jobalardy qarjylandyrý merzimin 3 jyldan 5 jylǵa deıin jáne odan da kóp ýaqytqa uzartý qajettigin basa aıtty.
«Bul máseleni kóptegen jyldar boıy ǵalymdarymyz kótergen bolatyn. Memleket basshysy ǵylymı granttardy júzege asyrý merzimin bes jylǵa deıin ulǵaıtýdy tapsyrdy. Bul otandyq ǵylymnyń damýyna jaqsy serpin bolady dep oılaımyn. Osylaısha, eldiń áleýmettik-ekonomıkalyq damýynyń basymdyqtary aıqyndaldy. Endi Prezıdent aıtqandaı – «... bizdiń damýymyzdyń sheshýshi kezeńi bastaldy jáne memlekettik apparat biryńǵaı tetik retinde jumys isteýge mindetti. Tek osyndaı jaǵdaıda ǵana biz alǵa qoıǵan maqsattarymyzǵa jetýdi qamtamasyz etemiz», - dedi Senat depýtaty.
