Aqylbek Kúrishbaev veterınarlardyń eńbekaqysyn kóterýdi surady
ASTANA. QazAqparat - Parlament Májilisinde «S. Seıfýllın atyndaǵy Qazaq agrotehnıkalyq ýnıversıteti» AQ basqarma tóraǵasy Aqylbek Kúrishbaev veterınar mamandardy jumysqa ornalastyrý kezindegi kemshilikterdi atady, dep habarlaıdy QazAqparat.
«Qazirgi kezde elimizde joǵary bilimdi aýyl sharýashylyǵy mamandaryn daıarlaýmen 20 JOO aınalysady. Onyń ishinde beıindi bolyp turǵan tek úsh agrarlyq oqý ornynda aýyl mamandarynyń 50 paıyzdan astamy daıarlanady. Al qalǵany beıindi emes 17 JOO-da daıyndalady. Veterınarııa da medıtsına sekildi kúrdeli ǵylym. Eger de biz biliktiligi joǵary veterınarlardy kórgimiz kelse, olardy daıarlaýdy tek beıindi oqý oryndarynda júzege asyrý kerek. ıAǵnı, kadrlyq ári zerthanalyq bazasy bar JOO-lar ǵana mamandardy oqytýy tıis», - dedi A. Kúrishbaev veterınarııalyq jáne fıtosanıtarııalyq qaýipsizdik máselelerine arnalǵan dóńgelek ústel otyrysynda
Osy oraıda ol veterınar mamandyǵynyń mártebesin kóterip, damyǵan elderdegi sekildi olardyń eńbekaqysyn laıyqty deńgeıge kóterý qajettigin atap ótti.
Sonymen qatar «Dıplommen aýylǵa» baǵdarlamasy talaptarynyń oryndalýy jaıyna toqtalǵan A. Kúrishbaev, «ókinishke qaraı, osy másele jergilikti atqarýshy organdardyń nazarynan tys qalyp otyr. Bul turǵyda bizdiń ýnıversıtettiń jaǵdaıy boıynsha mysal keltirgim keledi. Sońǵy 3 jylda bizde 300 veterınar aýyldy jerge jumysqa turýǵa bardy. Onyń ishinde tek jıyrmasy ǵana kóterme járdemaqyny aldy, sondaı-aq eki adam baspana alýǵa jeńildikti nesıege qol jetkizdi. ıAǵnı, tıisti zańnama oryndalmaı jatyr», - dep atap ótti.
