Aqylbek Kúrishbaev Úkimettiń depýtattyq saýaldarǵa bergen jaýabyn synady
Onyń aıtýynsha, 2 jyl ishinde ol Úkimetke 17 depýtattyq saýal daıyndaǵan, biraq, olarda kóterilgen kóptegen suraqtarǵa tolyqqandy nemese múlde jaýap almaǵan.
«Prezıdentimiz Qasym-Jomart Kemeluly Toqaev óziniń Joldaýynda memlekettiń damýynyń negizgi formýlasyn atap ótti. Ol: «kúshti Prezıdent – yqpaldy Parlament – esep beretin Úkimet», - dep atap ótti A.Kúrishbaev Senattyń jalpy otyrysynda.
Atap aıtqanda, senator jaqynda Qostanaı oblysynda bolǵan órtti mysalǵa keltirdi. Byltyr Úkimetke orman alqaptaryn qorǵaý salasyndaǵy júıeli problemalar jaıynda, ony erte anyqtaý úshin órtke qarsy kúrestiń qazirgi zamanǵy aqparattyq júıesiniń joqtyǵy jáne ormanshylardyń jalaqysynyń tómendigi týraly depýtattyq saýal joldanǵan. Alaıda, Úkimet taǵy da jalpylama jaýappen qutylǵan.
Sonymen qatar, Aqylbek Kúrishbaev eki jyl burynǵy azyq-túlik baǵasynyń ósýine, sondaı-aq joǵary oqý oryndaryn basqarý júıesin demokratııalandyrý, bıýdjetti bólý jáne otandyq selektsııa men tuqym sharýashylyǵyn damytý jónindegi ýnıversıtetter ǵylymı keńesteriniń ókilettikterin keńeıtý týraly usynystary bar depýtattyq saýaldar joldaǵanyn eske saldy.
«Osydan týra eki jyl buryn biz «saýda obektilerin qarjylandyrýdyń aınalym shemasyn» qaıta qaraý qajettiligin aıttyq, sebebi áleýmettik mańyzy bar azyq-túlik ónimderine baǵany retteý úshin onyń tıimdiligi tómen. Alaıda osy usynysymyzdy qaraý úshin 2 jyl ýaqyt jáne jańa saýda mınıstriniń kelýi qajet bolǵan sııaqty. Aqyrynda jańa mınıstrimiz saýda obektilerin qarjylandyrýdyń osy aınalym júıesin ózgertý kerektigin moıyndap otyr», - dedi senator.
Osyǵan baılanysty A. Kúrishbaev depýtattyq saýaldardy muqııat qaraý qajettigi týraly jáne Senat depýtattarynyń memlekettik organdarmen tikeleı dıalogqa daıyndyǵy týraly málimdedi.
