Aqylbek Kúrishbaev sózdi ispen dáleldeýge bel býdy
ASTANA. QazAqparat - «Sáken Seıfýllın atyndaǵy Qazaq agrotexnıkalyq ýnıversıteti» AQ basqarma tóraǵasy Aqylbek Kúrishbaev joǵary oqý ornynyń barlyq ǵylymı áleýetin bir oblystyń aýmaǵynda kórsetýdi kózdeıdi, dep xabarlaıdy QazAqparat tilshisi.
«Búgin men bir jańalyqpen bóliseıin dep edim. Shyny kerek, osy ýaqytqa deıin biz kóp nárseni aıttyq, kóp nárseni dáleldeýge tyrystyq, endi sonyń bárin ispen kórsetetin kez keldi. Qazaq agrotexnıkalyq ýnıversıtettiń ataq-abyroıyn kóteretin ýaqyt jetti. Sońǵy jyldary bul jerde ájeptýáir bilim men tájirıbe jınaqtaldy. Texnologııalar transferti jaǵynan da biraz jetistikter bar. Mine, osynyń barlyǵyn óndiriske engizetin kez keldi», - dedi Kúrishbaev búgin Memleket basshysynyń Qazaqstan xalqyna Joldaýyn talqylaýǵa arnalǵan jıynda.
Onyń aıtýynsha, aqpan aıynda Qazaq agrotexnıkalyq ýnıversıteti men Qaraǵandy oblysynyń basshylyǵy arasynda arnaıy memorandýmǵa qol qoıylady. Sonyń aıasynda joǵary oqý ornynyń ǵalymdary osy ýaqytqa deıin jınaqtaǵan tájirıbesin iske asyryp kóredi. «Shamamen, aqpannyń ortasynda Qaraǵandy oblysynyń basshylyǵy bizge keledi. Sonda memorandým rásimdeledi. Sóıtip, biz barlyq tájirıbemizdi bir oblystyń úlgisinde kórsetýdi kózdeımiz. Qashyqtan basqarý texnologııalardan bastap mal men jer sharýashylyǵy salasyndaǵy jańalyqtarǵa deıingi tájirıbemizdi pash etip kóremiz.
Budan bólek, bizdiń stýdentterimiz Qaraǵandy oblysynyń iri aýyl sharýashylyǵy kásiporyndarynda is-tájirıbeden ótetin bolady. Sol jerde jumysqa qalady dep senemin. Ondaı ýaǵdalastyq ta bar. Osylaısha, biz Qaraǵandy oblysyna bilim men texnologııalardy berip qana qoımaı, kásibı mamandarmen de qamtamasyz etetin bolamyz. Al ǵalymdardyń jalaqysy jáne taǵy basqa shyǵyndary óteledi. Oblys ákimi de bıýdjetten tıisti qarjyny bólýge ázir», - dep atap kórsetti ýnıversıtet basshysy.
