Aqylbek Kúrishbaev soltústik óńirdegi bıylǵy eginniń shyǵymyna alańdaýly
ASTANA. QazAqparat - S.Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaev soltústik óńirdegi bıylǵy eginniń shyǵymyna alańdaýly, habarlaıdy QazAqparat.
«Búginde túsken qardyń qalyńdyǵy shekteýli bolyp otyr, shamamen 10-15 sm deńgeıinde. Meteomálimetter boıynsha Aqmola oblysynda keshegi jaǵdaı boıynsha qardyń qalyńdyǵy tek 18 santımetrdi qurady. Bul óz kezeginde ortasha deńgeıden 70-75 paıyzǵa tómen. Osy oraıda aqpanda, naýryzda qardan asa joǵary tıimdilik bolmaıtynyn aıtýǵa bolady. Sondyqtan da tabıǵı qolaıly jaǵdaıdy kútemiz, ıaǵnı jazǵy jaýyn-shashynǵa, ásirese maýsymdaǵy jańbyrǵa senim artamyz», - dedi A. Kúrishbaev.
Bul turǵyda rektor ýnıversıtet ǵalymdary fermerlerge qoldaý jasaýǵa daıyn ekenin atap ótti.
Aıta keteıik, búgin atalǵan ýnıversıtette Aqmola oblysynyń ákimi Málik Myrzalınniń, QR Aýyl sharýashylyǵy mınıstrliginiń jaýapty hatshysy Ermek Kósherbaevtyń qatysýymen birlesken keńes ótip jatyr. Jıyn barysynda oblys aýmaǵynda eńbek ónimdiligin arttyrýǵa qatysty usynystar talqylanýda.
Budan buryn habarlanǵandaı, elimizdiń soltústiginde negizgi astyq ósiretin oblystarda agroónerkásip keshenin tsıfrlandyrý jumystary S.Seıfýllın atyndaǵy Qazaq agrotehnıkalyq ýnıversıteti arqyly iske asyrylady.
