Aqylbek Kúrishbaev: Prezıdent baǵytyn búkilhalyqtyq qoldaý qajet
«QR Prezıdenti Qasym-Jomart Toqaev búgingi Joldaýynda elimizdiń odan ári saıası, ekonomıkalyq jáne áleýmettik jańǵyrýynyń basty baǵdaryn aıqyndap, jańa ádil qoǵam – jańa Qazaqstannyń bazalyq ınstıtýttaryn qalaı qurý kerektigi týraly aıtyp berdi. Bizdiń bárimiz de memlekettiń ekonomıkalyq órkendeýinen keıin «aldymen ekonomıka, sodan keıin saıasat» degen qaǵıdat qoǵamdy demokratııalandyrýǵa, elimizdiń búkil halqyn ıgilikke qol jetkizýine alyp keledi dep úmittengen edik. Biraq, bizdiń qoǵam eki álemge: baı jáne kedeı adamdarǵa bólinip ketti. Al bul áleýmettik ádiletsizdik pen teńsizdikti týdyryp qana qoımaı, ekonomıkanyń turaqty damýyna kedergi bolady», - dedi ol.
Senatordyń atap ótýinshe, sondyqtan Prezıdentke «Jańa Qazaqstan» qurylysyn onyń saıası bazısin qaıta qurýdan bastaýǵa týra keledi.
«Eń aldymen, biz sýperprezıdenttik basqarý formasynan kúshti Parlamenti bar prezıdenttik respýblıkaǵa kóshetinimizdi atap ótken jón. Bul bılik ınstıtýty men eldiń turaqty damýynyń ońtaıly teńgerimin qamtamasyz etedi. Mundaı saıası júıe kezinde Qazaqstanda jeke tulǵaǵa tabyný, bılikke degen favorıtızm men monopolııa bolmaıdy dep oılaımyz. Endi Májilis depýtattary saılaýshylarmen tikeleı saılaný arqyly ishinara majorıtarlyq negizde saılanatyn bolady. Depýtattardy partııalyq tizimder boıynsha usynýǵa qatysty bul jerde de progressıvti demokratııalyq ózgerister bolady. Saıası partııalardy tirkeý aıtarlyqtaı jeńildetiledi. Olardy qalyptastyrýdyń karteldik qaǵıdaty umytylmaıdy, ıaǵnı partııanyń saılaýdaǵy jeńisin tek básekelestik aıqyndaıdy», - dedi Aqylbek Kúrishbaev.
Ol Prezıdent partııa múshesi bolýdan bas tartý týraly da oryndy sheshim qabyldaǵandyǵyna nazar aýdartady.
«Bul partııalyq júıeni qalyptastyrý kezinde ashyq básekelestik kúreske kepildik beredi. Ákimder men olardyń orynbasarlaryna partııa fılıaldarynda qyzmet atqarýǵa tyıym salýdy zańnamalyq turǵydan bekitýdi asa mańyzdy dep sanaımyn. Senattyń jumysyn ishteı biletin senator retinde Memleket basshysynyń qos palataly Parlamentti nege qoldaǵany maǵan túsinikti. Ol Parlament depýtattarynyń sany týraly emes, olardyń jumys sapasyna qatysty bolyp otyr. Bizdiń atqarýshy bılik jumysyndaǵy basty problema el bıýdjetindegi qarajattyń jetispeýshiligi emes, olardy tıimdi paıdalanýǵa baılanysty dep sanaımyn. Qarapaıym tilmen aıtqanda, eger ár depýtat Úkimetke onyń jumysynyń álsiz jaqtaryn kórsetip, ekonomıkany tıimdi basqarýǵa májbúr etse, onda bizdiń ómirimiz áldeqaıda jaqsy bolar edi. Meniń oıymsha, Prezıdent bizdiń qoǵamymyz úshin dál osyndaı yqpaldy Parlamentti qalyptastyrý úshin qajetti negiz qalaıdy», - dedi senator.
Onyń atap ótýinshe, qazirgi ýaqytta azamattarymyzdyń memlekettik bılikke degen senimin arttyrý asa mańyzdy.
«Sondyqtan bastalǵan ózgeristerdi toqyratpaı, Prezıdenttiń baǵytyn búkilhalyqtyq qoldaý qajet. Sondaı-aq jaıly jerge otyryp alyp bárin túgeldeı synǵa ala bermeı, árqaısymyzdyń naqty iste belsendi bolýymyz aýadaı qajet, - dedi Aqylbek Kúrishbaev.
