Aqylbek Kúrishbaev ormanshylardyń sanyn eki ese kóbeıtýdi usyndy
Senator Úkimet basshysnyń atyna joldaǵan depýtattyq saýalynda orman sharýashylyǵy salasyndaǵy birqatar problemalardy sheshý qajettigin aıtty.
Jańa jyl qarsańynda aǵashtardy zańsyz kesý máselesi erekshe ózekti bolyp otyrǵanyn ataı kelip, jazanyń qatańdaǵanyna qaramastan, jyl basynan beri 224 zańsyz aǵash kesý faktisi tirkelgenin jetkizdi.
«Ósip turǵan aǵashty qyrqý ata dástúrimizde bolmaǵan. Jańa jyl qarsańynda búkil qalalarda qylqan japyraqty aǵashtardyń taý-taý bolyp satýǵa shyǵarylǵanyn kórýge bolady. Qazaqstanda ózge elderdegi sııaqty jańa jylǵa arnap aǵashty tabıǵı jolmen daıyndap kesý tájirıbesi jolǵa qoıylmaǵan. Sondyqtan oryndy suraq týyndaıdy. Importtyq aǵash dep kórsetilip, ózimizde zańsyz kesilgen aǵashtar satylyp jatqan joq pa? Bir aǵashty kesý arqyly biz jylyna 100-den 700 kelige deıin ottegi joǵaltamyz. Bir gektar orman 10 tonnan astam ottegi shyǵarady», -degen Senat ókili qalyptasqan jaǵdaıdyń birneshe sebebin atady.
«Búginde bul saladaǵy eń qıyn másele - kadrlarmen qamtamasyz etý. Eger 30 mıllıon gektarǵa jýyq aýmaqta orman qoryn baqylaýdy tek 147 ınspektor júzege asyrsa, orman resýrstarynyń saqtalýy týraly ne aıtýǵa bolady?
Olardyń sanyn burynǵydaı keminde eki ese kóbeıtý usynylady. Qazirgi ýaqytta olardyń tehnıkamen qamtamasyz etilýi normatıvtiń 60%-nan aspaıdy. Ormanshylardyń ortasha jalaqysy nebári 70 myń teńge ǵana. Jalpy, orman sharýashylyǵy Qazaqstandaǵy eń tómen jalaqy alatyn sala bolyp tabylady.
Mamandar ormandy saqtaý tuqym suryptaýdan bastalatynyn aıtyp júr. Osyǵan baılanysty zamanaýı selektsııalyq ortalyqtar qurý qajet. Eldiń búkil óńirlerinde orman tuqymynyń keshenderin uıymdastyrý kerek.
Orman órtinen talaı aǵashtan aırylyp otyrmyz. Sondyqtan árbir orman sharýashylyǵynda órtti erte bastan anyqtaıtyn zamanaýı aqparattyq júıe engizý qajet», - dedi depýtat.
