Aqylbek Kúrishbaev Aýyl sharýashylyǵy mınıstrliginiń ózge memorgandarǵa kiriptarlyǵyn aıtty

NUR-SULTAN. QazAqparat – QR Parlamenti Senatynyń depýtaty Aqylbek Kúrishbaev Úkimetke Aýyl sharýashylyǵy mınıstrliginiń ózge memorgandarǵa kiriptarlyǵy týraly depýtattyq saýal joldady, dep habarlaıdy QazAqparat tilshisi.

Senator QR Premer-Mınıstri Álıhan Smaıylovtyń atyna joldaǵan depýtattyq saýalynda agrarlyq salany qarjylandyrýdaǵy poblemalardy kóterdi.

Onyń málimeti boıynsha, ótken 4 jylda agroónerkásip keshenin damytý jónindegi memlekettik baǵdarlamalardy iske asyrýǵa 2 mlrd teńge bólý josparlanǵan. Alaıda is júzinde tek 1,6 mlrd teńge ǵana jumsalǵan. Senator aýyl sharýashylyǵy vedomstvosynyń ózge memlekettik organdarǵa kiriptarlyǵy keıbir kezde shuǵyl sheshim qabyldap, áreket etýge kedergi keltiretindigin aıtty.

«Bizde aýyl sharýashylyǵy mınıstriniń barlyq negizgi normatıvtik buıryqtary mindetti túrde basqa memlekettik organdarmen kelisiledi. 2020-2021 jyldary sýbsıdııalaý qaǵıdalaryn, reglamentterdi kelisýge 20-30 kúnnen jeti aıǵa deıin ýaqyt ketti. Bul jerde salany jedel basqarý týraly qalaı aıtýǵa bolady», - dedi senator.

Depýtat byltyrǵy qurǵaqshylyq agrobızneske qatty áser etkenin eske saldy. Al ónimderdi eksporttaýǵa tyıym salý jáne kvotalardy engizý sharýalardyń tabysyn shektep tastaǵan.

«Bıyl kóptegen aýylsharýashylyq taýar óndirýshileri egistikterde qar toqtatý sharasyn uıymdastyra almady. Bul máseleler kóktemde topyraqtyń ylǵaldylyǵyna keri áserin tıgizetini anyq. Sondyqtan bıyl qalyptasqan jaǵdaıda Memleket basshysynyń Úkimettiń keńeıtilgen otyrysynda egin egý jumystaryn ýaqtyly júrgizý úshin sharýashylyqtarǵa barlyq jaǵdaı jasaý jónindegi tapsyrmasyn sapaly oryndaý óte mańyzdy», - dedi Aqylbek Kúrishbaev.