Aqylbek Kúrishbaev Astanadaǵy Agrarlyq ýnıversıtettiń rektory bolyp taǵaıyndaldy

Ýnıversıtettiń burynǵy basshysy Aıtbaı Qabykeshuly Bulashev óziniń qyzmettik merziminiń aıaqtalýyna baılanysty jumystan bosatyldy. Veterınarııa ǵylymdarynyń doktory, professor A.Bulashev Astananyń eń kóne joǵary oqý orny S.Seıfýllın atyndaǵy Qazaq agrotehnıkalyq ýnıversıtetin 2004 jyldyń qarashasynan bastap basqaryp keldi.

Kúrishbaev Aqylbek Qajyǵululy buǵan deıin birqatar laýazymdyq qyzmetterdi atqardy. Eńbek jolyn 1983 jyly V. Vılıams atyndaǵy Qazaq eginshilik ǵylymı-zertteý ınstıtýtynda bastady. Atalǵan mekemede qatardaǵy laboranttan dırektordyń orynbasaryna deıingi laýazymdyq qyzmetter atqardy. 1997 jyly A.I. Baraev atyndaǵy astyq sharýashylyǵy ǵylymı-zertteý ınstıtýtynyń dırektory bolyp taǵaıyndaldy. 2002 -2005 jyldar aralyǵynda - Aýyl sharýashylyǵy vıtse-mınıstri, 2006 jyly QR AShM Ǵylym departamenti dırektory bolyp taǵaıyndaldy. 2007 jyly Qazaqstan Respýblıkasy Aýyl sharýashylyǵy vıtse-mınıstri, 2008 jyldyń sáýirinen 2011 jyldyń sáýirine deıin QR Aýyl sharýashylyǵy mınıstri laýazymynda boldy.

Aıta keteıik, S.Seıfýllın atyndaǵy QazATÝ birneshe jyldar boıy QR Aýyl sharýashylyǵy mınıstrligine qarasty bolyp keldi. Taıaýda Májilis depýtatynyń saýalnamasynan keıin, JOO QR Bilim jáne ǵylym mınıstrliginiń qaramaǵyna ótti.