Aqylbek Kúrishbaev agroónerkásip keshenin ǵylymı qamtamasyz etýge qatysty usynystar aıtty
NUR-SULTAN. QazAqparat – Senattyń jalpy otyrysynda QR Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2020 jylǵy respýblıkalyq bıýdjettiń atqarylýy týraly esepterin talqylaý kezinde senator Aqylbek Kúrishbaev agrarlyq ǵylymdy damytý máselesin kóterdi, dep habarlaıdy QazAqparat tilshisi.
«Qazir biz salany ǵylymı qamtamasyz etýdegi artta qalýshylyqtan agrarlyq óndiristiń qandaı shyǵynǵa ushyrap jatqanyn óz kózimizben kórip otyrmyz. Qarjy mınıstrligi ǵylymdy jetkiliksiz qarjylandyrýdy bıýdjet tapshylyǵymen túsindiredi. Biraq jyl saıyn 7 mlrd teńgege jýyq bıýdjet qarajaty sheteldik selektsııa tuqymdaryn sýbsıdııalaýǵa jumsalady. Al asyl tuqymdy maldy shetelden satyp alýǵa 500 mln AQSh dollarynan astam qarajat ketti. Olardyń bir bóligi memlekettik sýbsıdııalar bolyp tabylady. Agrarlyq ǵalymdarymyz jarty jyldan beri memlekettik qarjylandyrýdan tys qalyp otyrǵan jaǵdaıda, agrarlyq ǵylymdy damytýǵa qatysty qandaı sóz aıta alamyz», - dedi A. Kúrishbaev.
Osy oraıda ol agrarlyq ǵylymı zertteýlerdi uıymdastyrýdyń jańa, tıimdi formatyn usyndy.
«Birinshiden, aýylsharýashylyq óndirisiniń suranysyn óteı almaıtyn «shıki» ǵylymı ázirlemelerdiń paıda bolý sebepteriniń biri – agrarlyq zertteýlerdi júrgizý merziminiń úsh jylmen shektelýi. Osyndaı qysqa ýaqyt ishinde álemde esh jerde jańa sorttar men agrotehnologııalar jasalmaıdy. Sondyqtan agrarlyq salada alǵa qoıylǵan mindetterge baılanysty jáne ǵylymı ázirlemelerdi óndiriske engizýdi eskere otyryp, 5-15 jylǵa arnalǵan uzaq merzimdi ǵylymı-tehnıkalyq baǵdarlamalar engizýdi usynamyz. Ekinshiden, mundaı zertteýlerdiń taqyrybyn aýyl sharýashylyǵy ónimderin óndirýshilerdiń usynystaryn negizge ala otyryp anyqtaý qajet, olar salanyń strategııalyq mańyzdy mindetterin sheshýge baǵyttalyp, konkýrstan tys, ıaǵnı konkýrssyz iske asyrylýy tıis», - dedi senator.
