Aqylbek Kúrishbaev agrarlyq mamandyqtarǵa qalalyqtar nege kóptep túsetinin túsindirdi
«Mamandardy daıarlaýǵa qatysty sheshimdi qajet etetin másele bar. Shyndyǵynda da agrarlyq oqý oryndaryn támamdaǵan jas mamandar kóbinese aýylǵa barmaıdy», - dep toqtaldy rektor.
Onyń sózine qaraǵanda, agrarlyq mamandyqtarǵa qalanyń balalary kóp túsedi. Sebebi UBT júıesi boıynsha joǵary ball jınaǵandar grantty ıelenedi.
«Grantqa ıelený úshin qalanyń balalary agrarlyq joǵary oqý ornyna tartylady. Shynyn aıtsaq, buǵan balalar aıypty emes, ıaǵnı osyndaǵy kemshilikter granttardy úlestirýdegi júıege baılanysty», - dedi A. Kúrishbaev.
Bul máseleni sheshý úshin endi agrarlyq mamandyqtarǵa granttardy bólý júıesi qaıta qarastyrylmaq.
«Sondyqtan da júıe qaıta qurylmaq. Bul rette bizdiń usynystar eskerildi, sáıkesinshe Úkimet basshysy (Baqytjan Saǵyntaev) qoldaý bildirip, Ómirzaq Estaıuly (Vıtse-premer - QR Aýyl sharýashylyǵy mınıstri) tıisti sheshim qabyldady. Endi granttardyń 70 paıyzy ataýly túrde aýyldyq kvota boıynsha aýyl mektepteriniń túlekterine bólinedi. Osy arqyly olar yntalandyrý tetikteri arqyly aýylǵa meńgergen kásibi boıynsha barady dep oılaımyn», - dedi JOO basshysy.
Aıta keteıik, búgin atalǵan ýnıversıtette Aqmola oblysynyń ákimi Málik Myrzalınniń, QR Aýyl sharýashylyǵy mınıstrliginiń jaýapty hatshysy Ermek Kósherbaevtyń qatysýymen birlesken keńes ótip jatyr. Jıyn barysynda oblys aýmaǵynda eńbek ónimdiligin arttyrýǵa qatysty usynystar talqylanýda.
Budan bólek rektor sharýashylyqtarǵa qajetti mamandarǵa qatysty pikir bildirdi.
«Jastarǵa jaǵdaı jasaý kerek, jergilikti jerlerde jaǵdaı bolmasa, onda jas mamandar barmaıtyny anyq. Osy oraıda mamandardy Aqmola oblysyna aldyn ala josparlap, sharýashylyqtar ózderi shaqyrýy kerek. ıAǵnı endi úlken sharýashylyqtardyń tapsyrysy boıynsha jumys isteýge ekpin qoıý qajet. Olar granttaryn ózderi tólegennen, biz maqsatty túrde mamandardy daıarlap beremiz. Osyndaı júıemen jumys istesek, aýyldarda bilikti mamandar jetkilikti bolady», - dedi Aqylbek Kúrishbaev.
Budan buryn habarlanǵandaı, osy aptada QR Aýyl sharýashylyǵy mınıstrliginiń keńeıtilgen alqa májilisinde agrarlyq ýnıversıtetterdiń túlekterin mindetti túrde aýyldaǵy jumystarǵa baǵyttaý sharalary eskerilip otyrǵandyǵy aıtylǵan bolatyn.
«Aýyl sharýashylyǵy mamandyqtary boıynsha grantpen bilim alǵan túlekterdiń aýyldyq jerde úsh jyldyq mindetti jumysyn óteýin engizý josparlanǵan», - dedi Aýyl sharýashylyǵy birinshi vıtse-mınıstriArman Evnıev.