Akvasharýashylyq salasyndaǵy ınvestıtsııalyq jobalarǵa 2030 jylǵa deıin 60 mlrd teńge bólinedi
ASTANA. KAZINFORM - Akvasharýashylyq salasyndaǵy ınvestıtsııalyq jıyntyqtyń jalpy quny 60 mlrd teńgeni quraıdy. Bul týraly Shymkent qalasynda ótken alǵashqy «AUYL FEST. Balyq sharýashylyǵy» halyqaralyq festıvalinde QR Aýyl sharýashylyǵy mınıstrliginiń Balyq sharýashylyǵy komıtetiniń tóraǵasy Serik Sermaǵambetov málimdedi.
Atalǵan bastamalardy iske asyrý agroónerkásip kesheniniń óndiristik áleýetin edáýir arttyrýǵa múmkindik beredi. Jańa nysandar paıdalanýǵa berilgennen keıin jyl saıyn 30 myń tonna jem jáne 14 myń tonna balyq óndiriledi dep kútilip otyr.
Serik Sermaǵambetov bul salanyń qazirdiń ózinde qarqyndy damyp otyrǵanyn atap ótti. 2021 jyly bastalǵan balyq sharýashylyǵyn damytý baǵdarlamasynyń nátıjesinde elimizdegi osy baǵyttaǵy sharýashylyqtar sany eki jarym eseden astam ósip, 700-ge jetti.
Óndiris kólemi jylyna 9 myń tonnadan 26 myń tonnaǵa deıin artty. Jeke ınvestıtsııalar kólemi de ulǵaıdy. 2021–2025 jyldary jalpy quny shamamen 26 mlrd teńgeni quraıtyn balyq ósirý jáne óńdeý boıynsha 95 joba júzege asyryldy. Bul jobalardyń jalpy óndiristik qýaty jylyna 20 myń tonnadan asady, nátıjesinde shamamen 1200 jumys orny ashyldy.
Salanyń negizgi damý tetigi — «Akvasharýashylyq týraly» zań aıasynda kórsetiletin memlekettik qoldaý.
Atap aıtqanda, jem satyp alý shyǵyndarynyń 30 paıyzy óteledi, al balyq shabaǵyn, dárilik zattardy jáne analyq qordy satyp alý shyǵyndarynyń 50 paıyzy sýbsıdııalanady. Sonymen qatar, jem óndirý zaýyttaryn, toǵan sharýashylyqtaryn, tuıyq sý aınalymy júıelerin jáne balyq ósirý oryndaryn qurý nemese keńeıtý kezindegi ınvestıtsııalyq shyǵyndardyń 25 paıyzy óteledi, sondaı-aq uńǵymalar burǵylaý shyǵyndarynyń 50 paıyzy jabylady.
2024–2025 jyldary akvasharýashylyq salasyndaǵy 10 kásipkerlik nysan jalpy somasy 5,7 mlrd teńge kóleminde nesıe aldy.
- Bıyl mınıstrlik akvasharýashylyq sýbektilerine aınalym qarajatyn tolyqtyrý úshin jyldyq 5 paıyzben 18 aıǵa deıin, al ınvestıtsııalyq jobalar úshin 6 paıyzben nesıe berý baǵdarlamasyn engizip jatyr. Jaqyn ýaqytta bul baǵdarlama iske qosylady, — dedi komıtet tóraǵasy.
Aıta ketý kerek, Shymkenttegi forým alańy Norvegııa, Japonııa, AQSh, Qytaı jáne basqa da elderdiń jetekshi sarapshylaryn biriktirdi. Qatysýshylar 2030 jylǵa deıin mejelengen maqsattarǵa jetý úshin jańa tehnologııalardy engizý jáne ınvestıtsııa tartý máselelerin talqylady.
Osyǵan deıin elimizde balyq sharýashylyǵyn memlekettik qoldaýdyń keshendi sharalary iske qosylǵany týraly jazdyq.
