Akvamádenıetti damytýǵa arnalǵan aqparattyq júıe engiziledi

ASTANA. KAZINFORM – Búgingi kúni «E-Fish» júıesinde balyq sharýashylyǵy jáne akvamádenıet salasyndaǵy 1196 sýbekt tirkelgen. Bul týraly AShM baspasóz qyzmeti habarlady. 

Aýyl sharýashylyǵy mınıstrligi balyq sharýashylyǵy salasyn kezeń-kezeńimen tsıfrlandyrýdy jalǵastyrýda.

Ótken jyly balyq jáne balyq ónimderiniń qadaǵalanýyn qamtamasyz etetin «E-Fish» aqparattyq júıesi iske qosyldy. Júıe balyq pen balyq ónimderiniń zańdy shyǵý tegin rastaıtyn qujattardy berýge qatysatyn memlekettik organdardyń aqparattyq qorlaryn ózara baılanystyrady. Negizgi maqsaty — zańsyz ónim aınalymynyń aldyn alý.

Búgingi kúni «E-Fish» júıesinde balyq sharýashylyǵy jáne akvamádenıet salasyndaǵy 1196 sýbekt tirkelgen. Bul olardyń jalpy sanynyń 95 paıyzdan astamyn quraıdy.

Biryńǵaı avtomattandyrylǵan basqarý júıesin «E-Fish» júıesimen yqpaldastyrý nátıjesinde belgilengen aýlaý kvotalary men balyq ósirý kólemderi asqan jaǵdaıda veterınarııalyq qujattardy rásimdeýge tosqaýyl qoıyldy. Júıeni engizýdiń arqasynda balyq ónimderiniń kóleńkeli aınalymy 2 myń tonnaǵa qysqardy.

«Akvamádenıet týraly» zańdy iske asyrý aıasynda 2027 jyldan bastap akvamádenıetti damytýǵa arnalǵan aqparattyq júıeni engizý kózdelgen. Ony qoldanystaǵy «E-Fish» júıesiniń negizinde «Akvamádenıet» atty jeke bólim qurý arqyly júzege asyrý josparlanyp otyr.

Akvamádenıetti damytýǵa arnalǵan aqparattyq júıeni júrgizý qaǵıdalarynyń jobasy ázirlenip, barlyq múddeli memlekettik organdarmen, sondaı-aq Ádilet mınıstrligimen kelisildi.

Jańa júıe akvamádenıettiń damýyn baqylaý men taldaýdy qamtamasyz etedi, sala sýbektileriniń tizilimin qalyptastyryp, júrgizedi, sondaı-aq qajetti derekterdi jınaý jáne óńdeý múmkindigimen akvamádenıet nysandaryn esepke alýdy, qadaǵalaýdy júzege asyrady. 

Aıta ketelik balyq sharýashylyǵy sýbektilerin E-fish júıesinde tirkeý kúshine engeni týraly jazǵan edik.