Akvamádenıet salasyndaǵy shaǵyn bızneske qoldaý keńeıtildi
ASTANA. KAZINFORM — 2026 jylǵy 1 qańtardan bastap balyq sharýashylyǵy salasyndaǵy ınvestıtsııalyq sýbsıdııalaýǵa qoıylatyn talaptar jeńildeıdi. Endi jylyna 25 tonnaǵa deıin taýarlyq balyq óndiretin kásiporyndar da memlekettik ınvestıtsııalyq sýbsıdııa alýǵa úmitker bola alady. Bul týraly Básekelestikti qorǵaý jáne damytý agenttigi málim etti.
Agenttik balyq ósirý salasynda óndiristik qýattardy qurý jáne keńeıtýge jumsalatyn shyǵyndardy sýbsıdııalaý kezinde týyndaıtyn kedergige taldaý júrgizdi. Praktıkalyq mysal retinde tuıyq sý aınalymy júıesin paıdalana otyryp bekire tuqymdas balyqtardy ónerkásiptik ósirýmen aınalysatyn «Qostanaı bekiresi» JShS jobasy qaraldy.
Bastapqyda joba jylyna 20 tonnaǵa deıin taýarlyq balyq óndirýdi, keıinnen óndiristik qýattardy keńeıtýdi kózdegen. Іske qosý jáne damý kezeńinde kásiporynǵa, onyń ishinde memlekettik qoldaý sharalaryn tartý arqyly, eleýli ınvestıtsııalar qajet boldy.
Alaıda, 2022 jyly agroónerkásiptik keshen sýbektileriniń ınvestıtsııalyq salymdary kezinde shyǵyndarynyń bir bóligin óteý boıynsha sýbsıdııalaý qaǵıdalaryna engizilgen ózgeristerdiń nátıjesinde (joba pasporty № 32, Qazaqstan Respýblıkasy Ekologııa, geologııa jáne tabıǵı resýrstar mınıstriniń 2022 jylǵy 14 maýsymdaǵy № 219 buıryǵy) jobalyq qýattyń eń tómengi shegi jylyna 45 tonna taýarlyq balyq deńgeıinde belgilendi. Atalǵan talap shaǵyn kásiporyndardyń, sonyń ishinde osy joba men oǵan uqsas balyq ósirý sharýashylyqtarynyń ınvestıtsııalyq sýbsıdııalaýǵa qol jetkizýin edáýir shektedi.
2024 jyldan bastap sýbsıdııalaý qaǵıdalaryn ákimshilendirý Qazaqstan Respýblıkasy Prezıdentiniń 2024 jylǵy 3 qańtardaǵy № 426 Jarlyǵyna sáıkes Qazaqstan Respýblıkasy Aýyl sharýashylyǵy mınıstrliginiń quzyretine berildi.
— Atalmysh kedergini joıý maqsatynda Agenttik 2024 jyly Qazaqstan Respýblıkasy Aýyl sharýashylyǵy mınıstrligine jobalyq qýattyń eń tómengi shegin jylyna 25 tonna taýarlyq balyqqa deıin tómendetý týraly usynystar joldady. Sonymen qatar, salalyq memlekettik organdardyń qatysýymen normatıvtik talaptardy túzetý jáne akvamádenıet salasynda shaǵyn jáne orta bıznes sýbektileriniń memlekettik qoldaý sharalaryna qoljetimdiligin keńeıtý múmkindikteri talqylanǵan birqatar jumys kezdesýleri men keńester ótti, — delingen habarlamada.
Máseleni pysyqtaý nátıjeleri jáne Agenttiktiń usynymdaryn eskere otyryp, 2025 jyly Qazaqstan Respýblıkasy Aýyl sharýashylyǵy mınıstriniń 2025 jylǵy 1 qarashadaǵy № 410 buıryǵymen tıisti kedergi joıyldy. Engizilgen ózgerister 2026 jylǵy 1 qańtardan bastap kúshine enip, jylyna 25 tonnaǵa deıin taýarlyq balyq óndiretin kásiporyndarǵa ınvestıtsııalyq sýbsıdııalar alýǵa úmitker bolýǵa múmkindik beredi.
Qabyldanǵan túzetýler shaǵyn kásipkerlik sýbektileri úshin memlekettik qoldaý sharalarynyń qoljetimdiligin keńeıtýge, akvamádenıet salasyn damytýǵa jáne balyq ósirý jobalarynyń ınvestıtsııalyq jaǵdaıyn arttyrýǵa baǵyttalǵan.
Eske sala keteıik, buǵan deıin balyq sharýashylyǵy sýbektilerin E-fish júıesinde tirkeý kúshine engenin jazǵan edik.