Aqushtap Baqtygereeva BQO qurmetti azamaty atandy
ORAL. QazAqparat - Búgin BQO ákimdiginde ótken jıynda soǵys jáne eńbek ardageri Muhtar Ájiǵulov pen belgili aqyn Aqushtap Baqtygereevaǵa «Batys Qazaqstan oblysynyń qurmetti azamaty» ataǵy berildi, dep habarlaıdy «QazAqparat» tilshisi.
Saltanatty jıynda oblys ákimi Altaı Kólginovtiń atap ótkenindeı, mundaı qurmetti ataq óńirdiń ekonomıkalyq-áleýmettik damýyna, jas urpaqty otanshyldyq rýhta tárbıeleýge zor úles qosqan adamdarǵa beriledi.
Oblystyq máslıhattyń bıylǵy 27 qyrkúıektegi sheshimimen M.Ájiǵulov pen A.Baqtygereevadan basqa «Batys Qazaqstan oblysynyń qurmetti azamaty» ataǵy óńirde segiz jyl basshylyq qyzmette bolǵan Nurlan Noǵaev pen álemdegi bıik shyńdardyń bárin baǵyndyryp, qazaqtyń kók baıraǵyn jelbiretken alpınıst Maqsot Jumaevqa da berildi.
Jıynda Aqushtap Baqtygereeva Jaıyqtyń qyzy dep tórge shyǵaryp, qurmettegeni úshin óńir jurtshylyǵyna rızashylyǵyn bildirdi.
BQO ardagerler keńesiniń tóraǵasy Myrzaǵalı Muhambetov, qalamger, Qazaqstan Jazýshylar odaǵynyń múshesi Mıra Shúıinshálıeva, soǵys jáne eńbek ardageri, tarıhshy-ǵalym Qalam Súıinshálıev, «Nur Otan» partııasy BQO fılıaly tóraǵasynyń birinshi orynbasary, oblystyq máslıhat depýtaty Serik Súleımen Muhtar Ájiǵulov pen Aqushtap Baqtygereevany qurmetti ataqtarymen quttyqtap, izgi tilekterin bildirdi.
Aıta keteıik, buǵan deıin «Batys Qazaqstan oblysynyń qurmetti azamaty» ataǵy 15 adamǵa berilgen. Olardyń arasynda buryn oblysqa basshylyq etken Mustaqym Yqsanov, Qabıbolla Jaqypov, Baqtyqoja Іzmuhambetov, akademık-ǵalym Rahymjan Eleshev, aqyndar Juban Moldaǵalıev, Qadyr Myrza Álı, Qaırat Jumaǵalıev, kompozıtor Eskendir Hasanǵalıev, soǵys jáne eńbek ardagerleri Bısen Jumaǵalıev, Ivan Gapıch, Sotsıalıstik Eńbek Eri Eskendir Esimov jáne basqalar bar.
