Aqushtap Baqtygereeva analarǵa eskertkish ornatýdy usyndy

ORAL. QazAqparat – «Atameken» óner ortalyǵynda Halyqaralyq otbasy kúnine oraı «Eńbegi janǵan arýlar» atty oblystyq isker áıelder forýmy ótti, dep habarlaıdy QazAqparat tilshisi.

Jıynǵa qatysqan Batys Qazaqstan oblysynyń ákimi Narıman Tóreǵalıevtiń atap ótkenindeı, Halyqaralyq otbasy kúni – halqymyz úshin mańyzdy mereke. Sebebi, otbasy memlekettiń irgetasy men dástúrli qazaq qoǵamyndaǵy úlken qundylyq bolyp tabylady.

«Jalpy, otbasy saıasatyna qatysty máseleniń barlyǵy Prezıdentimiz Qasym-Jomart Kemelulynyń únemi nazarynda. Memleket basshysynyń tapsyrmasy boıynsha ótken jyly «2030 jylǵa deıingi otbasylyq jáne genderlik saıasat tujyrymdamasy» qaıta pysyqtaldy. Onyń negizinde memleket jáne qoǵamdyq ınstıtýttar tarapynan otbasylardyń ál-aýqatyn arttyrý boıynsha keshendi sharalar qabyldanyp jatyr», - dedi óńir basshysy.

Memlekettik otbasy saıasatyn júzege asyrý maqsatynda 2006 jyldan QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, oblystarda óńirlik komıssııalar qurylyp, óz jumysyn júrgizýde. Otbasy kúnine arnalǵan sharalardyń birqatary BQO ákimi janyndaǵy áıelder men otbasy-demografııalyq saıasat jónindegi komıssııanyń qoldaýymen uıymdastyrylyp otyr.

Óńir basshysynyń aıtýynsha, sońǵy jyldary elimizde áıelder kásipkerligin damytý qarqyn alyp keledi. Halyqaralyq tájirıbeni eskere otyryp, áıelderge arnalǵan bıznes-konsýltatsııalar, trenıngter, kásipker áıelder úshin ınvestıtsııalar tartý jumystary júrgizilýde.

2021-2025 jyldarǵa arnalǵan kásipkerlikti damytý jónindegi Ulttyq joba aıasynda 1 mamyrdaǵy málimet boıynsha oblysta 4 954 áıel jumyspen qamtý sharalarymen qamtylsa, sonyń 1 054-i bos jumys oryndaryna, 200-i áleýmettik jumys oryndaryna, 97-si jastar tájirıbesine jiberildi. Sondaı-aq 1 790-y qoǵamdyq jumystarǵa, 29-y «Alǵashqy jumys orny», 95-i «Kúmis jas», 1 429-y «Bastaý Bıznes» jobasyna tartylsa, 85-i grantqa qol jetkizdi. 175 áıel onlaın oqydy.

«Sonymen qatar qazirgi tańda óńirdegi kásipker qyz-kelinshekterdiń úlesi 50 paıyzdan asty. Shaǵyn bıznes kásiporyndarynyń jartysynan kóbin áıelder basqaryp otyr.

Onyń ishinde basym bóligi – qyzmet kórsetý salasy: atele, sulýlyq salondary, dúkender, jáne densaýlyq saqtaý, azyq-túlik jáne týrızm salalary. Oblystyq isker áıelder qaýymdastyǵy óńirdegi qaıyrymdylyq jáne jumyspen qamtý baǵytynda túrli jobalar jasap, óńirdiń áleýmettik-ekonomıkalyq damýyna úlesterin qosyp keledi», - dedi N.Tóreǵalıev.

Qazaqstannyń isker áıelderi qaýymdastyǵynyń prezıdenti Raýshan Sársembaeva memleket pen qoǵamnyń damýyna isker áıelderdiń qosyp otyrǵan úlesi mol ekendigin, olardyń Batys Qazaqstan oblysynda da kóptegen jobalardy qolǵa alyp, júzege asyryp jatqandyǵyn atap kórsetti.

Aqyn, Memlekettik syılyqtyń laýreaty Aqushtap Baqtygereeva uly dalada qazaq áıeli men qyz-kelinshekteriniń qandaı ról atqarǵanyna, qazir de ár salada eren eńbek etip jatqanyna toqtala kelip, Oral qalasynda Anaǵa taǵzym eskertkishin ornatýdy usyndy.

«Adamzattyń urpaǵyn ósirgen kim, ol – ana. Bizdiń bárimizdi jaqsylyqqa jetkizgen kim, ol – ana. Jalpy, álemdi ustap turǵan da – ananyń alaqany, ananyń meıirimi, ananyń aq súti. Sondyqtan Ana syılaýdy birinshi orynǵa qoıyp, Jaıyqtyń, álde Shaǵannyń jaǵasynda eskertkish ornatqan jón dep esepteımin», dedi A.Baqtygereeva.

Osyǵan oraı oblys ákimi N.Tóreǵalıev munyń óte oryndy usynys ekendigin, eskertkishti isker áıelder jáne kásipkerlerdiń qoldaýymen ornatýǵa bolatyndyǵyn aıtty.

Aqyn bastamasyn forýmdy júrgizgen BQO isker áıelder qaýymdastyǵynyń tóraıymy Jansulý Tóremuratova da qoldaıtynyn bildirdi.

Jıynda sondaı-aq QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa tóraǵasynyń orynbasary Elena Tarasenko, Astana qalasy saıasatker áıelder klýbynyń múshesi, QR Parlamenti Senatynyń eks-depýtaty Dınar Nóketaeva, Terekti aýdanynyń ákimi Álııa Muhanbetjanova jáne basqalar óz oı-tolǵamdarymen, usynys-pikirlerimen bólisti.