Aqushtap aqyn elge shyǵyp, rýhanı jańǵyrý baǵytynda sóz qozǵady
ORAL. QazAqparat - Qaratóbe aýdandyq mádenıet úıinde belgili aqyn, halyqaralyq «Alash» ádebı syılyǵynyń laýreaty, Qazaqstannyń eńbek sińirgen qaıratkeri Aqushtap Baqtygereevanyń shyǵarmashylyǵyna arnalǵan «Aq Jaıyqty jyrlaıdy aqyn júrek» atty jyr keshi ótkizildi, dep habarlaıdy «QazAqparat» tilshisi.
Shara barysynda aqyn Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan tapsyrmalardy júzege asyrý baǵytynda óz oı-tolǵamdarymen bólisti. Ásirese, ulttyń rýhanı jańǵyrýy úshin urpaq, sonyń ishinde qyz bala tárbıesin myqtap qolǵa alý qajettigin jetkizdi. Otbasy dińgegi nyqtalyp, memleket mártebesi bıikteı túsýi úshin áıel-analar ımandy da ıbaly, al erler aıbarly da aıbyndy, olardyń qorǵany bola bilýi kerektigin aıtty. «Týǵan jer» baǵdarlamasyn júzege asyrýǵa óz elin, óz jerin súıetin árkim úlesin qosa alady. Bul úshin aldymen týǵan jerge, Otanǵa degen súıispenshilikti jastardyń boıyna sińire bilý kerek.
Keshte Qaratóbe jáne Syrym aýdandarynyń ákimderi Ashat Shaharov pen Abat Shynybekov, aýyl adamdary eldiń rýhyn kóterip júrgen aqynǵa shynaıy izetterin bildirdi. Qaratóbe aýdandyq «Qaratóbe óńiri» óńiri gazetiniń redaktory, aqyn Ertaı Bımuhanov Aqushtap Baqtygereevtiń ómiri men shyǵarmashylyǵyna toqtalsa, jas aıtyskerler, syrymdyq Baýyrjan Shırmedınuly men qaratóbelik Raıymbek Ótepov tilekterin óleńmen jetkizdi. Aqynnyń jyrlary oqylyp, ánderi oryndaldy. «Kórermenniń óleńge degen qoshemeti men ystyq yqylasynan rýhanııatqa shóldeý, jan azyǵyna umtylystyń áli de mol ekendigin uǵyndyq. Aqyndar men óner adamdary osylaı eldi jıi aralap, mazmundy keshter ótkizse deımiz», dedi eńbek ardageri Orynǵalı Ermekqalıev.
Búgin Aqushtap Baqtygereevanyń osyndaı jyr keshi kórshiles Atyraý oblysy Qyzylqoǵa aýdanynyń ortalyǵy Mııaly aýylynda ótpekshi.
