Akýsher-gınekolog júkti áıelderge nege koronavırýsqa qarsy egý usynylatynyn aıtty

KÓKShETAÝ. QazAqparat - Kókshetaý emhanasynyń akýsherııa jáne gınekologııa jónindegi bas dárigeriniń orynbasary Juldyz Alpılam júkti áıelderge koronavırýsqa qarsy ekpe alýdyń nelikten mańyzdy ekenin aıtty, dep habarlaıdy QazAqparat tilshisi oblystyq ishki saıasat basqarmasyna silteme jasap.

Juldyz Alpılam áıel men balany kóbirek qorǵaý úshin júktilik kezinde nemese odan buryn vaktsınatsııadan ótken durys dep sanaıdy. Óıtkeni júktilik kóptegen fızıologııalyq ózgeristerdi týdyrady.

«Bul júktilik kezindegi ımmýnosýpressıvti jaǵdaı, bul gıperkoagýlıatsııa, júkti áıelderde progesteron gormony joǵarylaıdy. Jatyrdyń ósýimen keýde azdap qysylady, ókpege ekskýrsııa buzylady jáne áıel úshinshi trımestrde tolyq keýdemen dem ala almaıdy», - dedi gınekolog.

Juldyz Alpılamnyń aıtýynsha, ózin jáne bolashaq sábıdi barynsha qaýipsizdendirý úshin koronavırýsqa qarsy vaktsınatsııadan júktilikke deıin nemese júktilik kezinde ótý kerek.

«Eger áıel júktilikke deıin koronavırýsqa qarsy vaktsınatsııa almasa, onda ony júktilik kezinde, 16-37 apta ishinde saldyrǵany durys. Bul vaktsına qaýipsiz, áıel osy vırýsqa qarsy ımmýnıtetti alady. Eger organızm kenetten tiri vırýske kezikse, ol ony asımptomatıkalyq túrde juqtyrýy múmkin», - deıdi dáriger.

Kóptegen jaǵdaılarda júkti áıelder kelisedi jáne vaktsınatsııanyń mańyzdylyǵyn túsinedi. Biraq, Juldyz Alpılamnyń aıtýynsha, olardy aınalasyndaǵylar - týystary kerisinshe almaýǵa shaqyrady.

«Ókinishke oraı, bizde barlyq otbasy múshelerimen sóılesýge árqashan múmkindik bola bermeıdi. Sondyqtan men basqalardan bul máselege óte muqııat qaraýdy suraımyn. Óıtkeni, bıylǵy jyly oblysta 1 120 júkti áıel koronavırýspen aýyrdy, 52 áıeldiń jaǵdaıy aýyr boldy. Ókinishke oraı, beseýi kóz jumdy», - dep túıindedi dáriger.