Akýladan qashqan brıtanııalyq jeti shaqyrym júzip ótken
ASTANA. QazAqparat - Aýstralııa jaǵalaýlarynda daıvıngpen (súńgýir jabdyqtarymen sý astynda júzý) aınalysatyn brıtanııalyq Djon Kreıgtiń artynan tórt metrlik akýla erip otyrǵan. Biraq onyń sózine qaraǵanda, muhıt torpedosy Djonǵa shabýyldamaǵan. Bul jaılyBBC habarlady .
34 jastaǵy brıtanııalyqtyń sýǵa sekirgen ıahtasy jaǵalaýdan 7,5 shaqyrymǵa alystap ketip, Shark («Akýlalar múıisi») shyǵanaǵyna baryp toqtaǵan. Tájirıbeli daıvıngshi sý betine kóterilgende ıahtasy mańaıda bolmaǵan. Daýystap kómekke shaqyrǵan ol, qasyna akýlanyń jaqyndap kele jatqanyn kórgen.
«Ol maǵan óte jaqyn keldi, meni qyzyqtaǵandaı aınalshyqtap júzip júrdi. Akýla meniń kim ekenimdi, meni jeýge bola ma, joq pa, anyqtap almaq bolǵan sekildi. Tórt metrlik akýlamen betpe-bet kelgen soń, osy jerde kúnim bitti dep oıladym», - deıdi Kreıg.
Úreıden záresi ushqan brıtanııalyq aqyryndap jaǵalaýǵa qaraı júze bastaıdy. On bes mınýttaı artynan erip otyrǵan akýla Djonǵa shabýyl jasamaǵan. «Júzip kele jatyp, artyma qarasam, aıaǵyma tıer-tımes jerde akýlanyń tumsyǵy kele jatty», - deıdi ol. Degenmen muhıt jyrtqyshy Djonǵa tıispegen.
Úsh saǵattaı júzgen daıvıngshi jaǵalaýǵa aman-esen jetedi. Jarty saǵattan keıin ony áýedegi tikushaqtar baıqaǵan, taǵy azdaǵan ýaqyttan soń onyń janyna qutqarýshylar jetken.
«Osynshama qysqa ýaqytta jeti jarym shaqyrym júzýge bolady dep bireý aıtsa senbes edim, biraq artyńnan akýla ańdyp otyrsa, (...) bapkerdiń qajeti de joq shyǵar», - deıdi qutqarýshy Glenn Rıdjlı.
