Aqtútek boranda joldy qardan tazartý múmkin emes - Ulan Álipov
NUR-SULTAN. QazAqparat - Búgin «QazAvtoJol» UK« AQ basqarma tóraǵasy Ulan Álipov BAQ ókilderine Nur-Sultannan shyǵatyn qalaaralyq joldardy qardan tazalaý jumystaryn kórsetti, dep habarlaıdy QazAqparat tilshisi.
«Qosshy, Qorǵaljyn baǵytyndaǵy joldar ashyldy. Endi búgin keshke deıin Nur-Sultannan Býrabaıǵa, Qaraǵandyǵa deıingi aralyqtaǵy joldy tazalap bitiremiz degen jospar bar. Erteń keshke deıin Qostanaı, Pavlodar baǵyttaryndaǵy joldy tazalap, ashamyz. Pavlodar baǵytyndaǵy jumystyń aýqymy tym úlken. Sebebi Ereımentaýda qalyń qar túsip, boran soqqan. Jalpy, erteń Nur-Sultannan barlyq baǵyttaǵy qalaaralyq joldardy qardan tazalaýdy aıaqtaımyz. Jol tazalaýǵa Aqmola oblysynda 105 tehnıka, 300-ge jýyq jumysshy jumyldyryldy. Al Qazaqstan boıynsha 780-nen astam tehnıka qar tazalaý jumystaryna shyqty», - dedi Ulan Álipov.
Talapker men Qajymuqan aýyldarynyń aralyǵyndaǵy joldyń qardan tazalanǵanyn kórsetken basqarma tóraǵasy bul jerdegi qardyń qalyńdyǵy adam boıynan asyp jyǵylǵanyn aıtady.
«Barlyq ýaqytta da boranǵa daıyndalyp otyramyz. «Qazgıdromettiń» málimetinshe, mundaı boran 1964 jyly bolǵan eken. Bul ondaǵan jylda bir márte soǵatyn boran shyǵar dep oılaımyz. Budan keıin mundaı qatty boran bıyl bola qoımas. Jalpy, jaıaý burqasynǵa daıynbyz, tazalaımyz. Kún borap turǵanda joldy tazalap, ashamyz dep ýáde bere almaımyz. Óıtkeni, boran soǵyp, eshteńe kórinbeı turǵan kezde tazalaý jumystaryn júrgizý múmkin emes. Boran aıaqtala salysymyz birden joldy tezirek tazalaýǵa tyrysamyz», - dedi ol.
