Aktrısa Raıhan Qalıoldınanyń benefıs-keshi ótedi
ALMATY. 13 maýsym. QazAqparat - Almatyda 17 maýsym kúni Ǵ. Músirepov atyndaǵy Qazaq memlekettik akademııalyq balalar men jasóspirimder teatrynyń aktrısasy, Qazaqstannyń eńbek sińirgen qaıratkeri, «Daryn» memlekettik syılyǵynyń laýreaty, «Eren eńbegi úshin» medaliniń ıegeri Raıhan Qalıoldınanyń mereıtoılyq benefıs-keshi bolady.
Onda mereıtoı ıesiniń qatysýymen Ákim Tarazıdiń Janat Qajıevtiń rejısserligimen qoıylǵan «Jaqsy kisi» tragıkomedııasy kórsetiledi.
Raıhan Nábıoldaqyzy 1962 jyly 12 shildede Almaty oblysy, Aqsý aýdanyndaǵy Aqsý aýylynda dúnıege kelip, 1979 jyly Qarakemer orta mektebin úzdik bitirip, Almaty memlekettik teatr jáne sýret óneri ınstıtýtynyń teatr fakýltetine oqýǵa túsken bolatyn. Drama jáne kıno akteri mamandyǵyn ıgergen 1983 jyly joldama boıynsha aktrısa bolyp jumysqa qabyldanǵan memlekettik balalar men jasóspirimder teatrynda áli kúnge deıin eńbek etip jatyr. Ol sahnalaǵan rólderdiń qatarynda Janar (M.Áýezov «Alýa», Á.Taýasarov «Sen janbasań»), Aqtoqty (Ǵ.Músirepov «Aqan seri-Aqtoqty»), Zylıha hanshaıym (M.Baıdjıev «Erte, erte, ertede»), Uljan (Sh.Aıtmatov «Jelsiz túnde jaryq aı»), Jibek, Gaýhar (S.Balǵabaev «Qyz 20-ǵa tolǵanda»), Mádına («Eń ádemi kelinshek»), Eva (Ý.Shekspır «Mahabbat aıdyny»), Sánııa (B.Muqaı «Shyndyq detektory») sııaqty keıipkerler kóp. R.Qalıoldına sondaı-aq, kishkentaı balalarǵa arnalǵan qoıylymdarda da Asqabaq (F.Rodarı «Chıppollıno jáne onyń dostary»), sıyr (M.Ahmanov «Aldardyń aılasy»), mekıen (E.Elýbaev «Asar»), Aıǵanym (V.Alshynbaev «Kerqula atty Kendebaı»), Botakóz (S.Balǵabaev «Jymbala, Mıko jáne qasqyr») sııaqty túrli keıipkerlerdi somdady.
