Aktrısa qaza tapqan jol apaty: Sottalýshy Ilıas Kar túsinik berdi
ALMATY. QazAqparat - Almatyda aktrısa qaza bolǵan jol apatyna aıyptalǵan Gelandewagen júrgizýshisi Ilıas Kar sotta túsinik berdi, dep habarlaıdy QazAqparat tilshisi.
Sotta Ilıas Kardyń tergeý barysynda jol apatynyń jaı-japsaryn aıtqan vıdeo kórsetildi. Sottalýshynyń sózine qaraǵanda, ol Abaı-Seıfýllın dańǵyldarynyń qıylysyndaǵy baǵdarshamda qyzyl tús janǵanǵa deıin ótip ketýge áreket jasaǵan.
«Men ótip ketemin dep oıladym, biraq úlgermeı qaldym. Ol (Mitsubishi Galant - jábirlenýshiniń mashınasy) toqtap qalǵan avtobýstyń ar jaǵynan shyǵa keldi. Solaı soqtyǵystyq. Men ony kórgen joqpyn. Sodan keıin mashınadan shyǵyp, oqıǵa ornyna júgirip bardym. Aýdarylǵan mashına oń jaǵymen jatqan edi. Biz mashınany ornyna qoımaqshy boldyq. Sol kezde áldekimder dárigerler kelmeıinshe olarǵa tıispeý kerektigin aıtyp aıǵaı saldy. Men eseńgirep qalyp edim, sondyqtan ketip qaldym. Seıfýllın dańǵylymen kettim de, úılerdiń arasynda tańǵy 8-ge deıin júrdim. Sosyn Masanchı kóshesine shyǵyp, «baraholka» jaqqa kettim. Sol jerde dosymdy kezdestirip, sonymen boldym», - dedi Ilıas Kar tergeý kezinde túsirilgen vıdeoda.
Ol sondaı-aq tergeý barysynda meıramhanadan karaokege deıin Gelandewagen-di júrgizip barǵanyn aıtqan.
Sot otyrysynda Ilıas Kar korporatıvtik keshte alkogol ishpegenin qaıtalap aıtty.
«Men aýyrǵandyqtan sońǵy alty jyldan beri alkogoldi ishimdik ishpeımin. Men sý nemese kola ishtim. Shot shamamen 400 myń boldy», - dedi Kar sotta.
Sot barysynda ol karaokege deıin qalaı jetkeni týraly taǵy aıtyp berdi. Biraq onysy aldyńǵy túsinikten alshaqtaý boldy.
«Men meıramhanadan Grand Opera karaokesine deıin taksımen jettim, al áıelim men keıbir qyzmetkerlerge «saý júrgizýshini» shaqyrttyq. Tergeý kezinde men muny aıtqan joqpyn. Óıtkeni aýyr qylmys jasadym, tergeýshiniń meniń qaıda jáne qalaı ketkenimdi bilgeni kerek dep oıladym. Bastysy, oqıǵaǵa sebepshimin», - dedi sottalýshy.
Eske sala keteıik, qaıǵyly oqıǵa 2018 jylǵy 29 jeltoqsanda bolǵan edi. Abaı jáne Seıfýllın dańǵyldarynyń qıylysynda Mersedes Gelandewagen jáne Mitsubishi Galant kólikteri soqtyǵysqan bolatyn. Mersedes Gelandewagen baǵdarshamnyń qyzyl túsine ótip ketken. Jol apatynan 3 adam - Mitsubishi Galant júrgizýshisi men eki jolaýshy kóz jumdy. Sonyń biri - belgili aktrısa Sholpan Elgezek.
Jantúrshigerlik jol apatynan aman qalǵan aktrısa Aızada Satybaldıeva aýrýhanadan 1 aqpanda shyqty.
Jol apatynyń egjeı-tegjeıin bolǵan oqıǵany kózimen kórgen kýágerler aıtyp berdi.
Tergeý barysynda, sottalýshynyń jol apatyn jasaǵan kezde mas bolǵany anyqtalǵan bolatyn.
34 jastaǵy bıznesmen Ilıas Kardyń isine qatysty sot otyrysy 12 aqpanda bastaldy.
Avtory: Maııa Teńizbaeva
